! سيارتي و القطو

يسعد الإنسان دائما لشراء شيء جديد و يسعى جاهدا للمحافظة عليه و يعتني أيما عناية لتجنب خسارته أو فقدانه أو التقليل من قيمته .. زين و بعدين؟

ما يحصل مع أحد منكم إنه توّه مغسل سيارته و أول ما يطلعها من محطة الغسيل أو حتى لو مغسولة في البيت .. يحوشها ماي أو طين أو تغبر الدنيا فجأة؟ شي طبيعي الواحد يضيق خلقه و أنا واحد منهم لأني أغسل سيارتي في المحطة كل نهاية أسبوع مرة ..

 أسفط السيارة دائما في الحديقة .. أطلع الصبح للدوام ألقى آثار أقدام قطو على "غبق أو كبّوت" السيارة أو دبتها و خاطه على الجامة الأمامية أو الخلفية إلين يستقر الأخ على سقف السيارة و بالتحديد على الفتحة "التنتة" !!

أطوفها مرة .. صباح اليوم التالي نفس القصة .. في اليوم اللي يليه لأ مافي شي .. الظاهر مسير على الجيران .. أو ليش نروح بعيد .. سيارة أمي .. أبوي .. أخوي .. أختي .. البيت متأذي !!

كله يهون يا جماعة للحين .. أمس الصبح طلعت من البيت بروح الدوام و شفت آثاره على السيارة كالعادة .. متشرقد و متمقط و متدحوس على الفتحة و طبعات أقدامه على الجامة الأمامية .. لاحول ولا قوة .. ابتلشت .. وصلت الدوام .. سفطت بالسرداب .. نزلت و معاي جنطة لابتوب و آيباد و كتاب .. توني بحطهم على "الغبق أو الكبّوت" و لا أشوف آثار غريبة ..  محصور و مسويها .. و مسرسح إلى الدعامية !! لأ لأ .. جذي وايد .. سيارتي ما صار لها شهرين !!

أتساءل دائماً .. الحديقة بكبرها مو مكفيته !؟ .. شماله مسويها على سيارتي !؟ شمسويلك !؟ 

و السؤال الأهم منه .. هل يجوز تسميم أو قتل القطاوة بتهمة الإتلاف المتعمد للممتلكات مع سبق الإصرار و الترصد؟