مدونة ابن الكويت: sketching

نستكمل حديثنا بعد العودة من رحلة العمل التي قضيتها في دبي لمدة أسبوع تكللت ولله الحمد بالنجاح و طفت الاختبارين

نكمل لكم سالفة صاحبنا اللي خربت عليه سهرته ..

في اليوم الثاني للدورة .. و أنا ياي من الممر و لا اللي جدامي في الجهة المقابلة من الممر ياي صوبي .. أنا طالعته و ابتسمت له .. و يوم وصل سلمت عليه و كأنه ما صار شي أمس - ماله داعي أصلا أتكلم .. أنا شكو !! - المهم مشيت السالفة و جنه شي ما صار .. أنا حسيت من أول ما سلمت عليه انه مرتبك .. لكن يوم مشيت الفيلم و سويت نفسي ما أدري ارتاح الريال ..
و الحمدلله عدى اليوم الثاني و الثالث على خير ..

خبر للزميل حسام بن ضرار .. المحاضر الأسترالي أهداني كتاب من الكتب اللي شارك في تأليفها و كتب على الصفحة الأولى منه التالي .. اضغط على الصورة

for Khalid

May your success be as outstanding and as wonderful as your photographs

All the best

Alan Patching

the book link

التنفيس عن الضغوط ..

لحد يقولكم روحوا الشاليه ولا طلعوا تعشوا بمطعم و لا روحوا سينما !!
إذا كنتوا متضايقين من ضغوطات العمل أو الدراسة .. ثق تماما إن أفضل طريقة للتخلص من كل اللي طاف هي الموضحة في الأسفل ..

بتقولون استخف صح !؟

هذا الله يسلمكم جزء من يوم عائلي ممتع قضيته مع بنتي ..
طلعت معاها و وشريت لها ببايات - رسوم متحركة لغير الناطقين بالعامية - و كان في بالي فكرة .. فقلت لها الفكرة و تحمست لها .. مرينا الجمعية لتطبيق الفكرة .. و دشينا المكتبة و اختارت لي و لها كراسة تلوين نفس الشي و كل واحد خذا الألوان اللي يبيها ..

هني القمندة ..

صراحة .. أثناء التلوين حسيت بشعور غريب .. بساطة في التفكير باختيار الألوان .. و انسياب أقلام التلوين على البياض و سماع صوت صرير القلم و هو رايح راد على الورقة .. استمتاع لآخر لحظة !!
و عقبها شصار !؟ حسيت براحة نفسية لأني قضيت لحظات ممتعة مع بنتي .. أشياء بسيطة في بالي و ممكن أفكر انها سخيفة .. لكنها متأكد سترسخ في بالها و راح تقول حق كل من تشوفه إن أبوي شراله ألوان و كراسة و لون معاي ..

علشان ما تزعل بنتي .. شافتني أسوي "سكان" للرسمات اللي لونتهم و طلعوا على الشاشة .. جان تقول حتى أنا أبي "تصور" رسماتي بعد !!