Friday, February 15, 2008

ثقافة استهلاكية و خبر



زيادة الرواتب


مع اقتراب موعد إقرار الزيادات في الرواتب ، نسمع و نشاهد معاول الهدم الغير مباشرة لهذه البادرة - زيادة الرواتب - و التي لم تقر بعد، ما أقصده هو السعار المجنون و لهاث التجار - أصحاب المحلات و المعارض و المطاعم .. الخ - الغير مبرر وراء الفلس !!
يا جماعة حتى النخي و الباجلا !!؟ الله أكبر !! بالله هذا على شنو زايد سعر القوطي !!؟ أظن النخي قام ينزرع فوق الجبال أو الباجلا صار يطلعونه من بطن الحوت !!؟
الخباز الأثول يكون صايد الحركة .. يسويلك القرص أصغر بشوي !!
شارع المطاعم بالسالمية !! و ما أدراك ما شارع المطاعم !!
مريت مطعم من هالمطاعم قبل شهر أو أقل - طبعا بعد ما أعلنوا عن نيتهم لزيادة الأسعار - أذكر أني طلبت صاج شاورما و عصير كوكتيل .. أنا خابر العصير لذبح عمره بـ 400 فلس، لما ياب الفاتورة ولا 650 فلس !!
قلت له: خير إن شاء الله شصاير !!؟
قال: أصل احنا من إزبوعين كده رفعنا الأسعار 100 فلس و الأزبوع دع برضه رفعنا السعر 100 فلس كمان !!
طبعا الصاج الشاورما بـ 900 فلس ما أدري ليش !! أخاف طالب صاج لحم غزلان و أنا ما أدري !!
المهم اليوع ذيج اللحظة خلاني أدفع له ولا مو كفو والله !!

والله الشرهة مو عليهم .. الشرهة على المسئولين أولا إذا كان فيه مسئولين !!
ثانيا الشرهة على المستهلك نفسه .. مشكلتنا والله ان ثقافتنا الاستهلاكية مو واضحة المعالم، ولا نعرف نقاطع أو على الأقل ننبه غيرنا من المطعم الفلاني أو المكان الفلاني تراه رافع أسعاره - بوق أشكره بدون مبررات قوية - أيضا ضروري نعي أن هناك بدائل استهلاكية أخرى غير الصنف اللي مدمنينه من زمان .. مثلا كي دي دي رافع أسعاره .. المفروض بكل بساطة نحول على المراعي مثلا كبديل - طبعا بغض النظر إذا كان السعر اللي ارتفع مبررا أم لا - المهم انك بإمكانك تحصل بديل آخر

الله يستر من الزيادة في الرواتب و شنو تبعاتها المواطن و المقيم داشين نفق مظلم الأيام الياية !!
و على حسب علمي إن في تجار ناطرين زيادة الرواتب تعلن علشان يعلنون مقدار زيادة أسعارهم !!

قضية المنتجات الدنماركية

تطل علينا من جديد مشكلة الدنمارك و تحديهم السافر لمشاعر جميع المسلمين و النيل من رسولنا الحبيب محمد صلى الله عليه وسلم، لا أدري متى نتعلم كيف نتعامل مع من تعدى على ديننا !!؟
أبسط ما يمكننا فعله هو التخلي عن منتجاتهم نهائيا كما عودتنا الكثير من الجمعيات التعاونية

الغبار

هاردلك ويك إند !

أسماء بلدان ..

لعبة خفيفة ظريفة .. هل تستطيع تذكر أسماء بلدان و تكتبها باللغة الانجليزية خلال خمس دقائق .. تحدي


غزة


نشيدة جديدة لدعم غزة .. لقراءة الخبر

for download MP3


12 comments:

عــــاشــــه said...

قضية إرتفاع الأسعار عاد وباد على كل دول الخليج

نحن البيض إرتفع سعره وبعدين إختفى
الحين العيش (الرز) إرتفع وبدا يختفي

وهاي طرق للوي دراع المستهلك
ونحن مثل البقر...

ولا نغير شي

ولا الحكومه تتدخل
ولا وزراء الإقتصاد دارين بشي
فالحين بس يوقعون بإتفاقيات وحضور مؤتمرات

وإستثمارات بالهبل
لو كل دولة من دولنا نحن الفقيره زراعيا قامت وإستثمرت في كمن أرض زراعية في الهند والا في باكستان لزراعة الرز والمنتجات الأخرى جان سدوا بلادنا

بس العقل


ماأقول غير الله يعين المستهلك

Kuw_Son said...

عاشة

الصراحة الوضع في دول الخليج غائب عني .. بس من صوب الإمارات عندنا عاشة
;)

الله يستر !!

ReLaaaX said...

looooool
مالاحظت النخي والباجلا ضروري هاليومين اتعشى والا اتريق نخي


والزياده المليقة اللي مالها داعي مااقول غير حسبي الله ونعم الوكيل على اللي مخليهم يرفعون واحنا المقاريد ما بيدنا شي :/


اللي صج صج صج معورين قلبي اللي عندهم يهال صغار .. ياهل صغيرونو اسمالله عليه مصاريفه شكثرها هالنوبه يهال وبعمر واحد

--

من فضل الله عز وجل من حملتهم الغبية اللي طافت إلى هاليوم مايدش ابيتنا منتج دينماركي :))

وسبحان الله ! هاللي قاعد يصير ينطبق عليه قول الله عز وجل

لاتحسبوه شر لكم بل هو خير لكم


--

الغبره بالويك اند عندي ارحم من الدوامات يعني صج ان بنقعد بالبيت .. ولا نداوم ونتوهق

--

لوووول مااحب اللعبه مليقة اكتشفت ان معلوماتي الجغرافيه مش ولا بد
اكتفيت بدول العالم العربي وجم دولة من شرق آسيا واوروبا ;p

Um eL5aiR said...

هذي الزيادة قبل أن تتم الزيادة ..
اقصد زايديين الأسعار قبل لا يزيدون المعاشات من صج ..
اتوقع لو يزيدون المعاشات ( الرواتب ) لااح تكون في زيادة ثانية ..
_
الشي ء الآخر يا ليت نفعل مقاطعة المنتجات الدنماركية! نقاطع جم شهر و نرجع ! ياليت تكون المقاطعة على طوول مو مع كل صورة تنزل نقاطع و نرجع !
_
أدري طولت ! بس ما شاء الله اذا هذي نشيدتك فاعتقد اني سامعتها في سلام fm بس كنت اعتقد انها للحسيان ما شاء الله تقاااارب كبيير في الصوت ..
بالتوفيق ! :)

Catism القطويّة said...

التجار يتبعون سياسة "الدوا قبل الفلعة"! المشكلة أن الفلعة جاءت في رأس المواطن :\

ننتظر النشيدة إلكترونيا. أثق أنها رائعة كالعادة :)

بوركت جهودك دوما.

QiYaDiYa said...

بالنسبة للأسعار ..

شي ما يتصدق الصراحة !!

ابسط الاشياء ارتفع سعرها !

هذا اولها ..
الله يستر من تاليها..

و اذا على كي دي دي صح في استغلال ..
لكن لو نفكر فيها !

عصير تروبيكانا مثلا الواحد 200 فلس !
اشتري الي سعره 200 ما اشتري الي سعره 150 !

و كي دي دي عليه طلب بالسوق كبير ..

و بعدين الخطأ من الي ماسكين الجمعيات !

الحين لو اي احد يودي بضاعة للجمعية ..
تدري متى يعطونه ربع فلوسه ..
مو كلهم بس ربعهم !

اقل شي بعد 3 اشهر ..
تدري ليش ؟
يدخلون الارباح ودائع بالبنوك و ياخذون ارباحها !
فالتاجر هني يضطر انه يرفع سعره عشان يعوض نطرته !
طبعا ارتفاع الاسعار بالجمعيات يؤدي الى ارتفاع الاسعار بالمطاعم كون ان المواد الغذائية ارتفع سعرها ..


لكن السينما ترفع اسعارها !
و محلات الملابس و غيرها !
استغلااال ما بعده استغلاااااال !

بالنسبة للمقاطعة فعندي وجهة نظر اخرى ..

المتضرر من المقاطعة هم المسلمين نفسهم !!

مثال بسيط ..

جدي الله يرحمه عنده وكالة احد المنتجات الدنامركية ..
شرا الاسم فقط ..
و ماله اي شغل بالدنمارك !

بعد وفاته انتقلت الوكاله الى الورثة ..
فصار الوالد اهو الي ماسك الشغل ..

طبعا تمت مقاطعة المنتجات كونها الماركة دنماركية ..
لكن احنا مالنا شغل و ولا فلس يروح الدنمارك ..

لكن لو كان هذا المحل هو مصدر رزق العائلة الوحيد ؟
من وين راح ناكل !

هل بمجرد ان اسم الماركة موجود من ضمن لستة المقاطعة المنتشرة على الانترنت فيجب عليهم مقاطعة هذا المنتج !!

و انا اقيسها على اغلب المنتجات ..

واحد من اهلنا منتجاته امريكية ..
و الناس تقاطعه !
لكن ولااا فلس يطب امريكا !!

باختصار ..
اغلب الشركات الموجودة في الكويت يكون اصحابها مسلمين و كويتيين و قاعد يسبب لهم ضرر هالشي ..
كون انه مالهم اي شغل بالي صار بالدنمارك او غيرها ..

انا هني مو قاعدة ادافع ..
انا قاعدة ابين واقع ..

مو كل ماركة انتشر اسمها انها دنماركية قلنا نقاطعها !

نتأكد بالبداية و بعدين نقاطع !


عذرا على الاطالة ..
لكن في مفاهيم ارى انه يجب ان تصحح ..
و شكرا لك على الموضوع =)

Kuw Son said...

relaaax

الله يستر من المستقبل .. عد ما أتزوج و يصير عندي عيال و هالمصاريف !!

الله يستر !!

و أود هنا الالتفات أنه يجب التأكد جيدا قبل المقاطعة أن المنتجات التي نود
مقاطعتها تصب في مصلحة الدنمارك .. شكرا للأخت قيادية على التنبيه ..

و بالنسبة للعبة .. ضبطي ذاكرتج عدل .. لازم نعرف الدول علشان لصار وقت الفتوح الإسلامية المستقبلية تكونين عارفة و ين الوجهة .. مو تصير غزوة في السند وانتي رايحة جيبوتي !!
:P

جياج الله

um_el5air

ماراح نحس انه في زيادة لأن المواطن بكل بساطة ما راح يستفيد من الفلوس اللي يايته !!

الله يوفق الجميع و شاكر لج متابعتج :)

catism

والله اصبتي كبد القمندة !!

إن شاء أحط النشيدة عن قريب ..

Kuw Son said...

Qiyadiya

علا إذا هذي حقيقة اللي يصير في الجمعيات على قولتج .. عيل أكيد الجمعيات تتحمل جزء كبير في التسبب في زيادة الأسعار !!

الحين السالفة صاير استغلال شنيع في غياب القانون !!

و فعلا نبهتينا على شيء مهم بالنسبة للمقاطعة .. نرجو أن تصدر قريبا لائحة بأسماء المنتجات الدنماركية التي فعلا تصب في مصلحة الدنمارك حتى لا يتضرر أهلنا ..

الله يعطيج العافية و شاكر لج مشاركتج القيمة :)

Q80 Blogger said...

اي والله .. حطيت ايدك على الجرح
بما اني من عشاق شارع المطاعم

خبري قبل الوجبه .. الي اهو صونه خبز فرنسي وبطاط وبيبسي على دينار
آخر مره رايح دينار وربع

كل شي زاد بالديره
وليلحين ماشفنا زياده

اشلون اذا انزلت الزياده !!

الله يستر

يعطيك العافيه

Q80 Blogger said...

اي والله .. حطيت ايدك على الجرح
بما اني من عشاق شارع المطاعم

خبري قبل الوجبه .. الي اهو صونه خبز فرنسي وبطاط وبيبسي على دينار
آخر مره رايح دينار وربع

كل شي زاد بالديره
وليلحين ماشفنا زياده

اشلون اذا انزلت الزياده !!

الله يستر

يعطيك العافيه

Kuw Son said...

Q80_blogger

مو بس هلامطاعم الصغيرة اللي يمكن نقول غنه من الصعب ملاحقتها .. لكن حتى المطاعم الكبيرة اللي على البحر اللي لها قائمة طعام و مسعرة .. نقدر نحكم عليها ..

و شيليز واحد من اللي رفع أسعاره قبل شهرين تقريبا !!

الديرة سبهللة !!

Q8links said...

54
دولة
:)