Monday, April 30, 2007

!! عرق ما بشرب



قد يستغرب القارئ الكريم من العنوان الماصخ .. لكن مع الغوص في أعماق الموضوع ستتضح الصورة إن شاء الله ..
كعادتي اليومية في الدوام .. أطق فرة على المدونات و أعلق على المواضيع الجديدة .. شدني موضوع خلاجين فيرجن كتبه أخوي مؤيد في مدونته، طبعا أنا طقتني البوهة لما عرفت ان فيرجن تم إغلاقه !! صباااح الخير يا خالد توك تدري هههه !! أظن السالفة انكتبت في الجرايد و أخذت من الزخم الإعلامي ما أخذت لكن توني أفطن لأني ما شفت الجرايد من أسبوع أو أكثر !!

بحثت في جوجل عن الموضوع نفسه لفضولي الزايد لمعرفة تفاصيل الخبر .. وصلت إلى مدونة واحد من الناس حاط الخبر من أحد الجرايد الكويتية أظنها كويت تايمز و الخبر بالانجليزي .. المهم بعد قراءة الخبر .. حبيت أكمل قراءة الموضوع اللي وراه في نفس البلوق ..

هم شدني عنوان الموضوع .. قريت الموضوع وفحواه انه يقارن بين أغنيتين سخيفتين و حاط الأغاني للسماع و الشماتة و قوم يا خالد من اللقافة و شغل الأغنية .. شفت ان السالفة فيها لوود و انتظار فوقفت التشغيل و نزلت البراوزر و قعدت أشتغل على شي ثاني .. شوي ولا

عرق ماااااااا بـــــشرب !! أووووووف شنو هذا حسبي الله على إبليسك !!؟ و يلعلع الحبيب و أنا أسمع الكلمات و ويهي قام يقط ألوان !!
نوعها هشك بشك و مسخرة و الصوت عالي .. و من الخبصة طفيت الشاشة و ما سكت !! رعصت دقمة التشغيل لمدة ثواني علشان أطفي الجهاز بكبره .. شوي ولا يطفي .. أوووووف يالله غربله !! ما بغى يسكت لا بارج الله فيه .. ثواني جان يشتغل الجهاز و يرد يلعلع .. آآآآآوبووووووك لا بوووك و هالمرة فزيت و طاح عقالي و من الفشلة شلعت كيبل الشبكة ما أدري ليش و شلعت وايرات الشاشة كلهم و ما سكت !! والله ماكو إلا أمصع كيبل الكهرباء من عرجه .. يالله انقمت !! بللللل
و أتلفت يمين و يسار أشوة ماكو أحد يمي بس الصوت يسري و جنه العيد إلى غرفة المدير لأن الأرضيات سيراميك .. و نطرت شوي محد ياني و سأل عن هالمهزلة اللي صارت ههههههه ..

تستغربون ليش ما سكت الصوت اللي المفروض طالع من الشاشة ؟ لأن في سماعات داخلية في الجهاز يطلع منها الصوت ما أدري ليش متحول الصوت عليها .. هذي مالها حل إلا إنك تسكر البرنامج اللي قاعد يشغل الصوت أو انك تفصل الكهرباء عن الجهاز و هذا اللي حصل من الخسبقة !!

يوم هدت الأوضاع .. لبست عقالي و قعدت على حيلي .. ركبت الوايرات مرة ثانية و شغلت الجهاز .. لوج إن للوندوز و كل شي تمام للحين .. طلع لي مسج

From Firefox browser asking me:

Do you want to restore your previous sessions?

سألني تبي ترد تشتغل على المواقع اللي كنت فاتحها قبل إغلاق الجهاز بشكل مفاجئ؟ قلت أوكي .. تبطلت أربع مواقع و نطرت تسوي لوود .. شوي ولا عرق ما بــــشرب آآآآآآآآآه .. و صووووووت عالي !!
عاد كان في موظف حولي طاقته البوهه !! و أنا ويهي قام يقط ألوان ..وعينك ما تشوف إلا النور .. ماكو إلا كيبل الكهرباء .. أسرع حل .. والله و أمصعه من عرجه و أتلفت .. ياااااااه إحراج ما بعده إحراااج !!
أنا مستغرب شفيني ما سكرت البراوزر وافتكيت !؟ والله متعومس و ما قدرت أتصرف من الإحراج !!
توووووبة الحين أوافق على استئناف العمل على نفس الصفحات .. شغلت الجهاز و جنه قاعد يضحك علي .. أحس أنه استحى على دمه و بطل يلعب معاي ما سألني مرة ثانية لأنه اللي صار فيني مو شويه !!

الله لا يطيحكم بموقف مثل هذا .. أحمد ربي ان كان وقت ميت ما حولي أحد و لا جان علوووووم

Sunday, April 22, 2007

!! ناشف و مذوي

تحذيــــــــــر
ينصح الحوامل و مرضى القلب و أصحاب القلوب الرجيجة اللي تلوع جبدهم على أقل شي واللي على طريف بعدم قراءة هذا البوست و إغلاق البراوزر على طول من غير كلام أو التصفح بعيدا عن هذه الصفحة

يوم الخميس الماضي كان عندنا عزيمة كبيرة لرجال العائلة الكريمة في منطقة يواخير جبد و بالتحديد يواخير الهجن .. أدري 85% منكم ما يدلون هالمكان ههههه ... يمكن معلومة يديدة !!
بعد الغداء ، و بعد صلاة العصر .. عمي ياب طاري واحد من عيال عمنا ان عنده حلال و إبل - ما أدري شلون عنده هالهواية !!؟ مع إن اللي يشوف أهله و أخوانه يقول انت وين و هالسوالف وين !!؟ - المهم اقترح عمي علينا نسير عليه و نقعد عنده شوي، طبعا أنا أنظر للشغلة من ناحية التصوير ، فعلى طول وافقت ولا أنا ما أشتهي هالسوالف كلش غنم و إبل و بعارين و صخول و تيوس وماني عارف إيش !!
شغل الوالد السيارة و ركب يدي و عمي و أخوي و رحنا له .. والله يوم وصلنا ضيفنا الله يجزيه خير و تقهوينا عنده و حط لنا من هالتمر الطيب .. وأنا طبعا سلمت على الريال و رحت أصور ..
يوم خلصت ومليت تصوير ، دخلت الكاميرا و لحفتها و قطيتها بالسيارة، شوي ولا الحبيب صاحب المكان قال بحلب لكم نافة من هالنياق !! و أطمر من مكاني و أروح السيارة مرة ثانية و أنا أصوت عليه انطرني خل أييب الكاميرا بصورك وانت تحلبها !!
راح صوب القعدان - جمع قعود و هو صغير ذكر الإبل - و طلع واحد منهم يروح يرضع من أمه علشان ديدها يدر حليب ..



و لما المسكين حط حلجه ما مداه جان يوخره صاحبنا و قام يحلب أمه .. و الصغير يطق فرة و يرد يحط حلجه و يرضع شوي و يدزه .. أذاه مو مخليه يحلبها ، ذكرني صوت الحليب وهو ينزل بالطاسة بهايدي لما كان يدها يحلب العنز اللي في بيته فوق الجبل !!
خلص الديد الأول و انتقل لواحد متروس يحلبه ..





هني يبين الديد المتروس ما شاء الله .. يايله الدور



و القعود المسكين يحاول يشرب ولا الديد مذوي و ناشف ومافيه ولا قطرة !!



بعد ما انتهى صاحبنا من الحلب قال حق الصبي يوديه عند الضيوف، صورت الصبي وهو شايل الطاسة ..



طبعا قبل لا أصوره غرفت بأصابعي الرغوة اللي فوق الحليب .. الله الله الله .. أي رغوة كوستا ولا ستاربكس !! ياعمي طييييير .. رغوة طبيعية سبحان الله !!
حط الطاسة جدام عمي .. و صورت عمي و هو يصب الحليب في بوادي صغار .. ما أقدر أصف طعم الحليب !! شربت مرتين !! يا سلااااااااااام .. حااااار توه طالع من الديد لا تسخين ولا هم يحزنون على طول اشرب ..



صاج والله من قال:

إن كنت في البران و القيظ حاديك
إشرب حليب النياق و خل الميرندا

طبعا هي الصمان مو البران .. بس لأني كنت في منطقة صحراوية - كبد - تصرفت في البيت ..


اللي كمل قراءة الموضوع عفية عليه الصراحة ..

من يدري ؟ باجر تدش ستاربكس ولا حاطين إعلان قهوة اليوم

Steamed camel milk with caramel :P

Wednesday, April 18, 2007

أدعوا له بالشفاء


أدخل الجد الوالد القائد المستشفى العسكري إثر وعكة صحية ألمت به .. عسى الله يشافيه و يعافيه و يحفظه و يطول بعمره

Update

تم بحمدالله تعالى ترخيص الجد من المستشفى و عودته لمنزله

ما قصرتوا يا جماعة


Saturday, April 14, 2007

from Kuwait !!!!?

في يوم المطرة الجميلة .. يوم الخميس بالتحديد .. كنت في بيت يدي أتغدى .. و فجأة السما صارت سودة ماشاء الله من الغيوم .. خلصت غداي و لحسن الحظ كانت كاميرتي معاي .. قلت ماكو إلا مجمع الكوت .. يسوى أصور فيه منظر حلو مع الغيوم ..

وصلت الكوت و خذيت كاميرتي معاي .. طبعا من نزلت من السيارة إلين مشيت و عيون الأمن علي !! ما أدري وين داش أنا منطقة عسكرية !!

المراد خذيت لي جم صورة بس ما عجبني الغيم لأنه كثيف و صاك حده .. يبيله غيم مفرق علشان تطلع زروقة السما و تشكيلة الغيوم الساحرة ..

توني بمشي ولا مجموعة هنود قاعدين يصورون .. شافوا كاميرتي .. قالوا هذا شكله مصور .. سلم واحد منهم علي و قال ممكن تصورنا بكاميرتنا .. قلت أوكي ماكو مشكلة .. تفضل انت و ربعك صفوا يم بعض علشان أصوركم ..

عقب ما صورتهم .. قلت لهم وقفوا لحد يتحرك .. بصوركم بكاميرتي .. والله و خذيت جم لقطة و وريتهم الصور فاستانسوا .. سألني واحد

whats your name?

I said: Khalid ..

He asked also .. from where?

I said .. from Kuwait

He was surprized !!

تفاجأ الحبيب و ربعه اني كويتي و قاعد أصور و اللي أكثر من جذي اني معطيهم ويه .. ما أدري هالهنود ماخذين فكرة غلط عن الكويتيين انهم مدقرينهم و لاعنين أبو أسلافهم بالنكت .. أوكي ميخالف النكت ضابطة عليهم و ما أنكر .. لكن المعاملة هي الأساس ..
الحمدلله أنا واحد زين مع الكل سواء هندي و لا بنغالي ولا مصري ولا اي جنسية .. المعاملة هي الأساس عندي .. شلون تكسب قلوب الناس !؟ أكيد بالمعاملة الحسنة ..

تذكرت قول الشاعر :

أحسن إلى الناس تستعبد قلوبهم
فطالما استعبد الإنسانَ إحسانُ

بعد ما شافوا الصورة قلت له عندك إيميل؟
قال عندي و عطاني إيميله و قلت له بدز لك صورتكم ..

تشكر مني و استانس حده و أدري انه متفاجئ حيل .. و علامات التعجب على ويهه واضحة ..

توني بمشي جان يقول واحد منهم نبيك تصور معانا ..
وقفت و صورت معاهم و تشكروا مني ..

و طلعت من روحتي لمجمع الكوت بانطباع جميل .. اني أدخلت سرور لقلب إنسان و تركت انطباع حلو عنده يمكن عدل مزاجه اليوم كله ما أدري .. بس المهم كسب قلوب الناس ..

و هذي الصورة اللي دزها لي .. و هو ثاني واحد من اليمين



و دزلي إيميل ..

Dear Khalid
it was a surprising event for me and friends we never see a kuwaity friend like you., any way the snap is really fantastic appreciate ur talent and thanks for your cooperation. we enjoyed our photo that u took in our camera also i will snd that snaps along with this mail . any way nice to meet u khalid
we expect ur support in kuwait if possible kindly give ur mobile number and address
thank you
mail me if u r free
have a nice day
sanoj
mob - 642xxxx

و شاد حيله .. يبي موبايلي و عنواني .. تهقون أعطيه !؟
------------------------

و هذي بعض اللقطات اللي خذيتها من مجمع الكوت يمكن قبل أسبوع أو أكثر .. و هني راح تعرفون قصدي شنو يعني غيوم مفرقة و سماء زرقاء !!




و هذي بعد




و أخيرا .. أرفقت لكم مقاطع مضحكة واصلتني بالإيميل و أنا قاعد أكتب البوست ..

3 Years Old Kid Vs. Monster

Blood

و دمتم بفرحة

Monday, April 09, 2007

برج الحمام

بتحرك سريع داخلي في إدارتنا .. تنقالت أفواه الموظفين رسالة مفادها:

-----------------------------------
حياكم اليوم برج الحمام الساعة 8 مساءا .. انتوا معزومين
-----------------------------------

مدير إدارتي في الدوام عازم موظفين الإدارة في مطعم برج الحمام .. لا وكان العشاء في قسم الـشخصيات المهمة.

وصلت المطعم الساعة 8:15 و دشيت أنا و واحد من الربع المطعم و اخترقنا الصفوف إلى الغرفة الخاصة .. ولا الشباب بعضهم موجود و الباقي للحين بالطريج .. قعدنا نسولف و ندردش إلى أن وصل المدير و سلم و قعد يسولف معانا .. على ما تكاملنا .. قلنالهم ينزلون المازات و المقبلات.

طبعا المازات اللبنانية تنحط على الطاولة شي ورا شي !! والله ما ندري شناكل !! بلا مبالغة .. حطوا المنيو كله !!!

كنا 14 شخص .. كان الجو رائع جدا و ماكو كلفة لي أبعد الحدود !! تنكت و ضحك و وناسة و ضغاط بين الموظف و المدير
والله مديرنا ما جنه مدير بينا .. الشباب لابسين بنطرونات و ماكو رسمية و مديرنا أول واحد ..

بو حمد - المدير - قال لي جدام الكل .. انت حدك تونس برة الدوام لكن طاق الثقل علينا في الدوام !! هههه و الشباب إي صح صح ..
و قال لي .. من الأسباب اللي خلتني أحطك في بالي و أهلتك للوظيفة .. انك صاحب هواية رائعة ..

تدرون ليش يقول جذي .. أقول لكم بعد شوي :)

بوحمد ما خلى أحد ماشاء الله عليه .. يضغط هذا و ينكت مع هذا و يسولف مع هذا .. والله أحمد ربي على هالمجموعة الطيبة .. طبعا هذي الطلعات الحبية تتميز فيها إدارتي عن كثير من الإدارات .. ليش !؟ لأن إدارتنا ما تتعدى العشرين شخص تقريبا

و الله كان عشاء رائع و طلعة حبية و ودية لأبعد الحدود ..

أقول لكم ليش الحين ..

لأن بيني و بينه عامل مشترك .. ألا وهو التصوير ...
نعم مديري مصور بارع !! والله تصويره شي خيالي .. كان من الجيل اللي يصور قبل الديجيتال .. و هم دش مجال الديجيتال بعدين ..
أيام دراسته في أمريكا كان يصور هناك .. و يحب الطبيعة و المناظر و تصويره دائما من هالنوع ..
دائما أعرض عليه أعمالي و أطلب رايه و مشورته .. إنسان فنان و متمكن و له راي صائب و يحلل الصورة بشكل فني راقي جدا

و أثناء ما كنت أكتب الموضوع .. وقفت علشان بروح أستعد للصلاة .. شافني في الممر جان يقول لي .. تعال خالد أبيك ..
يوم دشيت الغرفة ولا حاط له كتابين عن التصوير ..

Rhythms from the Wild for Art Wolfe



Retrospective for Galen Rowell


كان عنده واحد من الشباب سألني انت شنو كاميرتك ؟ قلت له كانون .. قال شلون تصويرك ؟ جان يقاطعه المدير .. قال له شتحجي !؟ هذا الولد فناااان .. و قال لي اقعد اقعد ... قال بو حمد انت من غير مدح عندك عين فنية لا تخسرها .. كانت عندي قبل 10 إلى 15 سنة يوم كنت أدرس في أمريكا ..

وقال لي شوف هالكتاب .. اللي هو الثاني .. و يوريني مناظر !! الله الله !! والله مو زين تشوفونها !! شي خيالي !! و يمسك جم صورة و يحلل فيهم .. ما شاء الله عليه ...

المراد اني طلعت من الغرفة و أنا متشقق ههههه :)


و أقرأوا الموضوع التالي اللي كتبته في مدونة شباب كويتي

Friendly Work Environment

Tuesday, April 03, 2007

!! جعصنة

قد يستغرب القارئ الكريم لعنوان المقال .. و معنى جعصنة أي البخل !!

حوار دار بيني و بين أخت كريمة

هي: السلام عليكم و رحمة الله و بركاته
أنا: و عليكم السلام و رحمة الله وبركاته هلا أختي تفضلي
هي: معاك فلانة الفلانية أخت فلان الفلاني
أنا: والنعم و 3 أنعام - أخت واحد من الربع
هي: كلمني أخي عنك و قال لازم نضبطك معانا و نبيك تشاركنا في برنامج تلفزيوني لقناة إقرأ
أنا: خير ؟ شنو طبيعة البرنامج؟
هي: نبيك تسوي لنا مقدمة البرنامج الإنشادية
أنا: مستعد ما عندي أي مانع
هي: أخوي بدون إحراج .. هذا مجال بزنس و لازم تاخذ حقك .. شكثر تاخذ؟ لأنهم - أي مسئولي القناة - يقولون انك تستاهل و ما راح نقصر معاك.
أنا: قلت لها شكثر راح يكلف من الآخر بدون تفاصيل.
هي: راح أنقل هذه التفاصيل لهم إن شاء الله .. وأرد لك خبر

علشان تكونون في الصورة .. الأخت الفاضلة ليس لها علاقة بالقناة .. هي مجرد مقدمة للبرنامج و الأمر بيد مسئولي القناة .. لكن هي مكلفة من قبلهم انها تبلغني.

أرسلوا لي الكلمات عبر الإيميل .. الشاعر كان اسمه أحمد الغزالي .. كلمات خفيفة لطيفة و حلوة و تصلح لمثل طبيعة البرنامج ..
على فكرة اسم البرنامج .. ملكة جمال الأخلاق و راح تبث أول حلقة منه على الهواء مباشرة يوم الأربعاء 4 إبريل.

دزيت الكلمات حق الملحن عبر الإيميل .. و أشوة إنه ما بدا تلحين لأنه الحبايب غيروا رايهم و بلغتني الأخت انه تم تغيير الكلمات و راح يوافوني بكلمات أخرى اقوى و أحلى علا قولتهم !!

كلمت الملحن و قلت له لا تسوي شي للحين ما اعتمدوا الكلمات ..

تباطيتهم و كلمت الأخت .. وين الكلمات !؟ تالي دزتهم لي و قالت: يقول المسئول ترا احنا عندنا استديو و فيه خوش مهندس صوت و وصفت لي إياه و رحت أنا و مهندس الصوت صاحبي حقهم بنشوف شنو الاستديو اللي مدحت لي إياه !؟

المهم يوم وصلنا ولا شنو !؟ سرداب يلوع الجبد و غرفة ألوع و أجهزة قديمة و ما يرقى إلى مستوى أناشيد حديثة ! هذا مستواه عادي جدا يصلح لتسجيل محاضرات و قرآن فقط !!

قلت حق صاحبي: أقول خل نطلع أحسن .. ترا الشغل هني أي كلاااااام ..
و احنا في السيارة نتحلطم .. نقول والله عييييييييييييب .. قناة شكبرها شعرضها صارلها سنين في الفضائيات عيزانة تقط جم مية دينار تسوي لها مقدمة إنشادية مع توزيع راقي و شغل محترم !؟

مالنا إلا أستديوهات شركة رواج - الشركة المنتجة لمسلسل خالد بن الوليد

بدأنا التلحين و سوينا مقطع صغير و دزيناه عن طريق الإيميل علشان يسمعونه و يعطونا رايهم الحبايب
اتصل على مخرج البرنامج .. مصري الجنسية .. لوع جبدي .. ما تيجي عندنا و نسمع لك لايف !!!؟
أنا: لو سمحت أنا دزيت إيميل و فيه المقطع إم بي 3 اسمعه و عطني رايك
هو: ما اتأرب المسافات و تيجي عندنا نتمتع بصوتك !؟ أنا مش مؤمن بالحاجات دي الإيميل و البتاع !!؟
أنا: أخوي أنا واحد ما عندي وقت أتنقل و أروح و أيي .. ترا عندي 16 ألف شغلة غيركم .. بس لو سمحت تعطيني رايك و نتفاهم بعدين
هو: طب ماشي

أثاري تبين لي انهم يبون مقاطع آهات و حركات صوتية كفواصل للبرنامج إضافة إلى المقدمة الإنشادية ..

المهم جاءني الرد من المسئولين عن البرنامج عن طريق الأخت الفاضلة انه الدكتور الفلاني اللي ماسك القناة يقول .. ترا اللي طلبه صاحبكم واااااايد .. شرايج تقولين له المبلغ الفلاني زييييييين ؟

طبعا قسم المبلغ على 3 و شوي وطلعت له حسبة و قال يالله هذا خوش سعر !!

طرارة السالفة !!؟

قالت لي و اهي حدها منحرجة .. والله اني حاولت فيهم علشانك .. بس والله حززززززرة الجماعة .. مع انهم قتاة و عندهم موارد مالية بس يبون الشغل ببلاش !!

أهو أصلا معطين الكلمات حق واحد سوري يبي يسويلهم المقدمة الإنشادية ببلاش !! و مستانسين عليه !! بس هي جزاها الله خير قالت ما أبي هذا السوري يسويها .. صاحبنا أولى اللي هو أنا .. فلما طلبت السعر الفلاني ما عجبهم !!

أنا سمعت الحبيب شمسوي .. مسجل صوته .. ما أنكر أنه حلو .. لكن مواااااال !!؟ شكو مواااال في مقدمة برنامج على قناة مشهورة !؟

فعلشان جذي قالت لي احنا نبيك انت و اخترناك بالاسم و نبي نطلع إسمك ..جزاها الله خير

بس اللي حارني الجعصنة و الحزااارة اللي فيهم .. والله السالفة ما وقفت على 100 ولا 200 دينار .. السالفة انكم يا قناة إقرأ تبون شي يرضيكم و يرفع روسكم ندوا يمااااال الفقر !!

المهم .. سجلنا المقدمة لهم و توزيع خفيف لطيف و حلو و دزيتها بالإيميل لها ... وقلت لها أختي الحساب جذي و جذي كيفكم .. أنا قاط من جيبي حق الاستديو الحين .. تصرفوا
قالت: أكتب لنا فاتورة وفصل فيها شوي .. يعني حساب الاستديو و حساب الملحن و حساب التوزيع و حساب المؤدي
قلت: أوكي أنا ترا بحط المبلغ الفلاني و كيفهم يتصرفون
قالت: توكل على الله و راح أرد لك خبر باجر إن شاء الله بعد ما أقعد معاهم

سمعوا الفلم اللي صار .. اتصلت علي الأخت الفاضلة و قالت لي: ما راح يحطون النشيد اللي سويته إلا بآخر 4 حلقات من أصل 16 حلقة !!!
قلت: إي ليييييش شسالفة !؟ وين اتفاقنا !!؟
قالت: جذي طرت على بالهم يبون مغني يغني لهم أغنية الشارة - البداية - و اللي سويتها بيحطونها بين الفواصل بس بدون أسمك في الحلقات غير الأربع الأخيرة !!
قلت: ما اتفقنا على جذي !!
قالت: والله شسوي أنا مالي شغل أهم أصحاب القرار .. بس النشيد اللي سويته راح ينحط في مقدمة البرنامج في الحلقات الأربعه الأخيرة و مع اسمك
أنا بلعتها و سكت .. لأن صج لوعي جبدي بتعاملهم الزفت !!

و آخر شي دزت لي مسج و تقول انهم مو راضين على المبلغ اللي حطيته !! و تقول نقص منه 50 دينار و أنا أتصرف بالباقي !!

صج مسخرة القناة !!

لا و فوق هذا الأخت هي مقدمة البرنامج .. سألتهم مرة عن مكافأة رمزية نظير الجهد المبذول في الإعداد .. سوولها سالفة !!
تقول والله ما طلبت على الحلقة مبلغ و لو أطلب هذا من حقي .. لكن بس يبت طاري مكافأة صارت سوالف !!

عيب يا قناة إقرأ .. تبون الناس تشتغل لكم ببلاش و تكدون خير على أفاهم !؟

Monday, April 02, 2007

دعوة



يسرني أن أدعو القراء الأعزاء - البلوقرز الكرام - لحضور معرض التصوير الفوتوغرافي لأعضاء النادي العلمي - إدارة التصوير الفوتوغرافي و المقام في المارينا مول ابتداءا من الأربعاء القادم و لمدة 3 أيام



يشرفني حضوركم