Friday, March 30, 2007

كل مشروك مبروك

من باب كل مشروك مبروك ..

تابعوا البوست في مدونة شباب كويتي ..

إي نعم شباب كويتي

تنويه: مشاركتي في مدونة أخرى لا تعني أن أنقطع عن مدونتي .. فقرائي الأعزاء لهم مكانة خاصة

Saturday, March 24, 2007

!! إحرق غلاه ولا يهمك فراقه




كتبت في موضوع سابق عن مسج غريب جدا لم أكن أتوقعه من ولد عمتي .. خبص علي اليوم كله.

قبل جم يوم وصلني مسج من المصدر نفسه .. بس هالمرة عرفت ان الرسالة مغزاها عميق جدا و يقصد من ورائها أن أتمعن في معاني هذي الأبيات الجميلة .. فبعد هذا المسج صارعقد بيني و بينه .. من يوصله أبيات لها معاني عميقة راح يدزها لي و على طول بشارككم فيها :)

الأبيات تقول :

ما للرفيق إلا رفيقه ليا اعتاز
إما نفع ولا بلاش الرفاقة
أحدن لنا في مكسر الساق معكاز
و احنا له المعكاز في كسر ساقه
بعض العرب اسكب على صحبته قاز
احرق غلاه و لا يهمك فراقه


والله صح لسان من قال هذي الأبيات .. إحرق غلاه ولا يهمك فراقه !!

أفضل الخلان و الأصدقاء

من إذا استنصحته نصحك

و إذا غبت عنه حفظ ودك

و إن سمع عنك سوءا ذب عن عرضك

و إن احتجت له وقف بجانبك


و إن ضاقت عليك الدنيا وجدته حولك
------------------------

فمن لي بذاك ليت أني وجدته
لقاسمته ما لي من الحسنات !!

الشافعي


و أقول في هذا المقام:

اشخانة الدنيا

إذا مافيها رفيج ..
أشيله و يشيلني !؟

اشخانة الدنيا

لو صاحبي شافني أطيح ..
ما ألقاه يسندني !؟

اشخانة الدنيا

إذا مافيها صديق ..
إذا زليت يقومني !؟

اشخانة الدنيا

لو اني اعتزت ..
أدور يمين و شمال ..
أقول: وين ربعي !؟


اشخانة الدنيا

لو اني مت ..
محتاج دعاء ..
صديقي حتى المقبرة ..
ما مرني !؟


و أستشهد بقول الشاعر ..

ما أكثر الإخوان حين تعدهم
لكنهم في النائبات قليل !!


و في المقابل ..

أبي دنيا ..

فيها حب
فيها ود
فيها معزة

حب لله
بدون شروط

أبي دنيا ..

فيها الوفا
فيها الغلا
بين القلوب

ماهو عالورق
و بحبر مخطوط

أبي دنيا ..

أشوف الإخوان
أشوف الربع
أشوف الحبايب

مرتاحييييين
و الكل مبسوط

Sunday, March 18, 2007

رحلة إلى محمية صباح الأحمد

اليوم حبيت أعرض عليكم تفاصيل رحلتي مع مركز التصوير الفوتوغرافي بالنادي العلمي إلى محمية صباح الأحمد و التي كانت في يوم الخميس الموافق 8 مارس 2007، العدد فاق الثلاثين من أعضاء و عضوات المركز.

بدأت الرحلة بالتجمع في النادي العلمي الساعة 8 صباحا ، و قبل لا نحرك حطولنا ريوق الصراحة كان غدا مو ريوق ماشاء الله ..
بعد الريوق قسم رئيس المركز الأستاذ محمد العطار الشباب على السيارات و البنات في الباص .. و انطلقنا إلى الشمال صوب الصبية ..

وصلنا البوابة تقريبا على الساعة 9:30




على ما خذوا التصاريح منا و وقعنا على أوراق رسمية للتعهد بعدم المساس بالحياة الفطرية أو الإساءة لها .. الصراحة شي يسر انك تشوف اهتمام بهالطريقة .. ليت الكويت بجميع مناطقها تطبق فيها هذه التعهدات بعدم المساس بالزرع أو المرافق العامة !!

تجمعنا في الداخل بعد البوابة و انطلقنا على الجادة المخصصة .. ما يرضون أحد يشط و يطلع يدوس على العشب .. لأن الربيع هناك شي عجيب ما شاء الله .. هذا بعد احنا في شهر مارس .. لو يايين أبجر جان شفنا شي أعجب أظن !!







هذا المكان اللي في الصورة السابقة يسمى وادي الرمم .. قعدنا نصور فيه تقريبا ساعة و نص .. كل واحد يروح يمشي و معاه عدته و يصور على راحته .. الحلو في المكان ريحة الخزامى البنفسجي شي عجييب .. هذي لقطة و أنا منسدح بين الخزامى




شوي ولا أشوف أنا مع زميلي المصور يوسف الذويخ طيور ينقال لها أبو الخصيف .. كل واحد انبطح على بطنه و طلعنا العدة و ركبت عدسة الزوم

Canon 90-300mm

بس حسافة ماكانت بذيج القوة يبيلي أكبر من اللي عندي يعني

400mm and above

بس هذا اللي قدرت أصيده ..



طبعا المحمية فيها حشرات .. أنا و صاحبي اشتغلنا عليهم .. و اللقطات الصعبة اللي طلعت فيها باستخدام عدسة الماكرو

Canon 100mm macro lens

طبعا بدون تعليق يا جماعة .. لأني كنت ميت من الضحك أنا و صاحبي و احنا نصور ..



و الثانية .. الله يغربل إبليسهم .. ما كو حيا ولا مستحى !! بس هذي بروحي صدتها بعد الغدا .. بعدسة

Canon 18-55 mm

طبعا كان الكثير منهم متواجدين و عندهم موسم تزاوج .. لكن أخترت هذول الكبلز لأنهم حازوا على جائزة أفضل أداء للموسم الحالي



جني أدري الخنافس تقول .. الله ياخذهم ما خلونا نتهنى !!
لأني كل ما انسدحت و قربت الكاميرا أشوفهم يفلون .. و أنطر شوي يردون .. تالي أقرب شوي شوي .. إلين ما صدت هاللقطات

نادونا الربع لأن خلصنا من هالمكان و بنروح مكان ثاني يسمى طلحة !! ليش لحد يسألني !! ما أدري شنو علاقته بسجن طلحة ههههه

طبعا المشي يكون على الجادة فقط ..



وصلنا إلى طلحة .. و هي عبارة عن واحة صناعية .. الطيور عندها بالهبل !! بس حسافة طار عدد كبير منها لما شاف عددنا الكبير قادم
و هذي صورة المكان من مسافة بعيدة ..



و هذي هي الواحة الصناعية عن قرب ..اقعد يمها و اسمع تغريد الطيور .. يا كثرهم !!



و هذي بعض الصور اللي التقطتها باستخدام عدسة استعرتها من الزميل الأستاذ مصطفى البشير .. عدسة
Sigma 50-500

صعوة




سلاحي واقف على وحدة و نص !!



أيضا سلاحي آخر



و هني لقطات لبعض المصورين اللي تواجدوا بالقرب من الواحة الصناعية لتصوير الطيور

المصور الفذ الأستاذ فيصل البشر ..




و أخوي المصور المحترف الأستاذ مصطفى البشير



و زملائي من اليمين م.ضاري العبيد و جراح البلوشي



و المصور المجهول عبدالوهاب الأصبحي .. متغطي علشان الطيور ما تخاف منه و مطلع البازوكا بانتظار اللحظة المناسبة



و يوم حان وقت الغداء .. ما تلاقي أحد حول الواحة الصناعية .. طقنا اليوووع



و هذي بعض اللقطات اللي خذيتها قبل الغداء بفترة بسيطة باستخدام عدسة الماكرو
Canon 100mm Macro lens

هذي أم علي بس ممغوطة !!






هذي الوردة مسكرة و شكلها مثل القبضة !! سبحان الله



A New Life - Canon 18-55 lens used here




في النهاية أقدم خالص شكري لمركز التصوير الفوتوغرافي بالنادي العلمي و القائمين على هذه الرحلة .. لإتاحة الفرصة لي و لزملائي لزيارة محمية صباح الأحمد و التمتع بالتصوير في ربوعها ..
كانت تجربة جديدة بالنسبة لي و خصوصا التصوير الدقيق و تصوير الطيور ..

شكرا لكل من ساهم في إنجاح هذه الرحلة

Thursday, March 15, 2007

سيرة و مسيرة



كم هو إحساس رائع عندما تنعم براحة بال بعد عناء دام أيام بل أكثر من أسبوع .. و في نهاية العناء تعلم أنك قد أضفت شيئا إلى رصيد إنجازاتك .. فترتسم على وجهك ابتسامة الرضى و تردد من أعماق قلبك ..

الحمدلله الذي بنعمته تتم الصالحات ..


كم هو إحساس جميل و شعور يزيد من ثقتك في نفسك حين تتوافد عليك جموع من الناس تحييك و تثني على ما قمت به و تطلب المزيد من العطاء ..
لن أنسى تلك اللحظات الجميلة التي عشتها لليلتين متتاليتين مع أناس تشرفت بالانضمام لهم منذ أيام دراستي الجامعية و لي الشرف في الاستمرار بالعمل معهم بعد التخرج لإكمال مسيرة دامت أكثر من ربع قرن .. فلهم مني كل الشكر و التقدير ..

سيرة و مسيرة .. إنجاز يضاف لأجيال القائمة الحمراء ..

بوركت خطاكم

Wednesday, March 07, 2007

Google Reader - Amazing Tool !!

اليوم يا جماعة الخير عندي لكم شغلة حلوة .. تغنيكم عن الدخول من بلوق إلى بلوق علشان تشوف فلان نزل موضوع يديد ولا لأ

إذا سمعتوا بالـ

RSS


فهذا الموضوع اللي راح أتكلم عنه يعتبر من أنواعه بس تابع لشركة جووجل ..

أول شي لازم يكون عندك

Account on google " means Gmail account"

و الباقي كله سهل ان شاء الله

check this page .. google reader


after log in .. you will have this screen .. the home page



راح تشوفون علامة عند الموضوع اليديد .. باقي البلوقز ماكو يمهم أي رقم أو أي شي
معناه هذا البلوق ما عنده شي يديد ..



ضغطة على اسم البلوق راح توديكم إلى الموضوع على

Google reader page

ما يحتاج تدش البلوق إلا لبغيت تعلق .. اضغط على اسم الموضوع اللي قاعد تقراه و راح يقطك على الموضوع على طول .. و تعرفون بعدين خطوات التعليق المعتادة

و لإضافة بلوق جديد .. اتبع خطوات الصورة التالية:



يوم أضفت البلوق مالي كمثال .. تدرون شنو صار !!؟؟
لقيت انه فيه 7 مواضيع يديدة !!؟؟
أنا توني ماسح البلوق كله من عرجه !! و توني حاط موضوعين بعد المسحة !!
شلون صاروا 7 مواضيع !!؟



ضغطت على اسم البلوق مالي في الـ

Google reader

ولا كل مواضيعي الممسوحة من أول ما بديت أدون موجودة !!؟

منين يابهم ما أدري !!؟
الحمدلله الجهد كله ماراح .. نسخت كل شي على جهازي ..
بس اللي صج يحز في خاطري كل التعليقات من أخواني و خواتي المدونين و المدونات راحوا !!
طبعا مواضيعي اللي انمسحت أكثر من 7 .. بس البرنامج كتب 7 ولا لو تشوفون الـ

scroll bar

اللي على اليمين .. تلاحظون انه صغير جدا !! بدليل ان هناك مواضيع واااايد !!

راح أنزل آخر موضوع كتبته قبل المسحة ان شاء الله بعد هالبوست ..

و راح تلاحظون كل ما تضيفون بلوق يديد .. العداد مال المواضيع اليدية يزيد .. راح يعتبرهم كلهم مواضيع لم تتم قراءتهم ..

فتحتاجون لأول مرة بعد الإضافة انكم تسوون هالشي



و بعدين راح يسوي لوود و تصفر العداد من أول علشان تتابع المواضيع اليدية لحظة نزولها
و إذا تبي تصفر عداد بلوق معين .. روح على البلوق نفسه و طبق نفس الخطوات.



عاد مع العباثة شوي راح تعرفون شلون كنتوا مضيعين وقت في الدخول على بلوق بلوق !!

و ان شاء الله أكون وصلت معلومة مفيدة للجميع
و إذا في أي سؤال أنا حاضر

Monday, March 05, 2007

!! بعض البشر عيب عليك احترامه

أول بوست بعد النكبة .. يالله تجعلها انطلاقة ميسرة .. و بهمة أبناء هذا البلوق و بسواعدهم الفتية سأعيد بناء هذا الصرح من جديد ..
و ليخسأ الخائسون

:P

المهم .. اليوم الصبح و أنا قاعد في الدوام و مجابل موظف الشركة القادم من ديرته لإنجاز مشروع عندنا
يوصل مسج من ولد عمتي ..
يقول المسج:

بعض البشر طبعه مقدر و محشوم
وبعض البشر عيب عليك إحترامه
واللي ستر عيبه عن الناس بهدوم
وش يستره لا صار عيبه كلامه !؟


أنا بققت عيوني @@ و قلت شسالفة !؟ شصاير !؟ خير إن شاء الله !!
على طول رديت بمسج حقه:
عسى ماشر !؟

ماكو رد !! عسى الله يستر .. و أدق عليه ولا يشيله !! اشتغلت فيني !!
دزيت مسج مرة ثانية:

شسالفة ترى ضيقت خلقي بهالمسج يا ولد العمة !؟

و عمك أصمخ .. لا رد ولا هم يحزنون !! هني قلت لأ أكيد زعلان مني الريال وصاير شي جايد !! قعدت أوسوس و أرد أفكر باللي سويته هل جم يوم .. يمكن قاط كلمة مني ولا مناك !! مع اني مو شايفة صار لي شهر يمكن !! ولا اتصال ولا شي بيننا !!
الحين لا تسألوني عن المشروع لأني انعفست فوق حدر!!

دقيت على أخوي
أنا: وصلك مسج من ولد عمتي !؟

شكو قايل له جذي ما أدري !

أخوي: لا والله ليش !؟
أنا: ولد عمتي فلان داز لي مسج و فيه بيت شعر كيت وكيت
أخوي: أووف ليش !؟ زين شسويت !؟
أنا: دزيت له مسج ودقيت عليه ولا رد !!
أخوي: لا بالله الولد يبيك !!
أنا: والله مو مسوي شي ولا بطلت حلجي و لا غلطت على أحد
أخوي: أنا أقولك .. دق على عمي فلان و كلمه


دقيت على عمي و قلت له السالفة

أنا: عمي تكفة ترا ولد العمة طشرني بهالمسج !! شسالفة
عمي: لا يكون قايل شي ولا شيات !؟
أنا: والله اني راجعت نفسي و عصرت مخي ولا طلع معاي شي !!
عمي: تلاقيه داز المسج بالغلط
أنا: والله جان زين ,, بس ليش مايرد علي هذا اللي محيرني !!
عمي: لا ما عليك يمكن مشغول

أنا أدري يمكن يكون مشغول بحكم طبيعة دوامه بس مو لي درجة ما يرد علي !!

أنا: عمي تكفة دق عليه وقولي شيصير وياك ترى والله مو مسوي شي !!
عمي: إن شاء الله الحين أرد لك خبر

طبعا رديت الاجتماع مال المشروع و قلبي و عقلي مو معاي !!

شوي ولا داق عمي

عمي: مايرد الظاهر انه مشغول
أنا: خير إن شاء الله

وتزدااااااد الحسرة !!

شوي ولا الحبيب مطرش مسج بكل بروووود :

لا ماكو شي .. بس بيت سمعته من المحاضر في الدورة و طرشته لجم واحد !!
أدق عليك بعد شوي !!

دزيت له مسج:

الله ياخذ إبليسك خبصتني :)

الحمدلله تعدل المزاج و رديت أركز بشغلي .. شوي ولا داق .. هااااا شسالفتكم انتوا اختبصتوا !؟
كل واحد دزيت له المسج رد لي بمسج يقول:
- أفااااا .. عسى ماشر يالحبيب !؟
- ويييييي .. أنا أستاهل تقول لي هالكلام !؟
- شصاير !؟ شسالفة !؟ منو مزعلك !؟

وقال ترى والله ماكو شي .. كل اللي فيها اني كل ما عجبني بيت شعر ولا مقوله على طول أكتبها بتلفوني و أدزها !!

يا سلام !! و إحنا الضحايا !! ههههههه .. والله ما سوت علي .. مسج وطشرني !!

الله لا يحطكم بجذي موقف و لا يطيحكم بصديق أو قريب عنده هالهواية الغريبة :)

و دمتم بلا خبصة

Sunday, March 04, 2007

!! كارثة

قدر الله و ما شاء فعل ..

بالخطأ تم مسح البلوق بجميع مواضيعه !!

لا حول ولا قوة إلا بالله !!

هذي العباثة و ما تسوي :)

Saturday, March 03, 2007

!! شفايف و عيون فـتـانة



بعد ما صليت الفجر اليوم بفضل الله و منته .. قال لي الوالد الله يحفظه .. بروح اليوم سوق السمج اللي في الكوت .. قلت له بروح معاك .. لأنه راح يصير خوش موضوع للبلوق :)

رحت كملت نومتي إلين ما دش علي أبوي و قعدني و قالي .. ها يبا !! فيك روحة ولا بتنام ؟
قلت له : لا كاني يالله أقوم الحين .. و على ما غسلت و لبست و زهبت عدة التصوير .
طبعا اليوم حايشتنا عاصفة رملية !! الغبار واصل للركبة !! شي مو طبيعي .. الفجر الواحد ما يقدر يتنفس !!
بس على الساعة 8 الصبح أشوة طخ الجو شوي ..
وصلنا الكوت .. و طلعت كاميرتي من الجنطة و مسكتها باليمين و الجنطة باليسار .. و يوم حطيت بالي للأمن .. تذكرت سوالفهم و أسئلتهم و تحقيقهم .. جان أهون و أحط الكاميرا في الجنطة ودشيت السوق و الجنطة على كتفي .. محد يدري شنو فيها ..

و الله و افترينا أنا والوالد .. حاط في باله نقارير .. يبي اليوم الغدا نقارير مشوية :)

وصلنا صوب البسطات و شغل المزادات .. هذا يصارخ من صوب و الثاني من صوب و السلال مكودة و هالخير يالله من فضلك .. و الناس تشيل من هالسمج ..
هني لعبتي أنا .. حطيت الجنطة على كرسي بعيد عنهم و ركبت العدسة المناسبة .. و أثناء ما أنا أركب .. كان قاعد يمي شايب كويتي ..
يسألني: انت أي جريدة !؟
قلت له: أنا مو تبع جريدة .. قاعد أصور حق نفسي :)
قال لي: الأخ كويتي !!؟ " ليش كنت لابس جينز و تي شيرت"
قلت: إي نعم عمي كويتي ..
قال: أول مرة أشوف كويتي يصور !!!
قال لي: انت من أي منطقة ؟
قلت: المنطقة الفلانية
قال: منو من أهل المنطقة !؟
قلت: من العايلة الفلانية ..
قال: والنعم .. من ولده انت !؟
قلت: من عيال فلان .. على اسم يدي .. لأني قلت أكيد يعرف اللي كبره ..
قال: والله انت من عيال فلان !؟ ماشااااء الله :)
و سألني: فلان تعرفه ؟ وفلان شنو يصير لك ؟
جاوبته و استانس علي ..

المهم ركبت فوق العتبة و قعدت أصور من فوق شوي .. ولا الأمن ياي لي .. طبعا عارف شيبي يقول و خالص منهم من كثر ما أذوني بالكوت !!
الأمن: انت بتاع جريدة ولا لوحدك ؟
أنا: لا بيا لوحدي ..
طالعني شوي و مشى .. دفعة مردي




و عقب ما صورت اجتماع الناس على السلال و المزادات .. رحت حق ابوي و سالته يبا منو ذاك
الشايب ؟ قال لي والله يا بوك هو من أهل الفحيحيل و يدك يعرف وايد منهم ..

الله على العيون !! يا عيني على الجمال
P:
الشادو شد بلاده ما يحتاج



و هذا النقرور الفريش .. ما يحتاج



شفاااااايف نقروور .. يا عيــــــني على الـ
Lip Gloss
هذي الشفايف ولا بلاش .. مو شغل ترهيم
:P




المهم أبي أصور شايب عجبتني ملامح ويهه القاسية .. قاعد أقول حق أبوي أبي أصور هالشايب .. يقول لي . دير بالك لا تسوي لنا سالفة .. ترى هذا هو تاجر سمج كبير من أهل الفحيحيل ولد العايلة الفلانية .. لا يحمق عليك الحين ..
طبعا من وجهة نظر المصور .. صوَر بلا حدود و لا تخاف .. و فعلا صدته ..



و افتريت على البسطات أصور السمج و الوالد يشتري و يعبي بهالجياس .. إلين ما حسيت اني مصختها
.. لأن ما بقى أحد بالسوق ما خزني !!






الموضوع قاعد أكتبه قبل الغدا .. و يوم طاح الغدا اركض لا تركض .. إلا شنو النقارير !!؟ الله الله شي عالمي .. اللهم لك الحمد نعمة عسى الله يديمها ..
والله احنا بخير و نعمة .. غيرنا مو لاقي ياكل شي ..

تذكر أن لك اخوانا في الإسلام لا طعام لهم ولا مأوى .. فلا تبخلوا عليهم بالدعاء .. فإن الرسول صلى الله عليه و سلم قال: من لم يهتم لأمر المسلمين فليس منهم

اللهم ارحم ضعف اخواننا الفقراء و المستضعفين من المسلمين ..

اللهم أطعم جائعهم
واستر عوراتهم
وآمن روعاتهم
واشف مرضاهم
و عاف مبتلاهم

و أتمم علينا نعمتك
و اجعل بلدنا آمنا مطمئنا
رخاءا سخاءا
و سائر بلاد المسلمين
.. اللهم آمين

تأملوا معي حديث نبيكم الكريم عليه أفضل الصلاة و أجلها و أتم التسليم حين قال:

من أصبح منكم آمنا في سربه، معافى في بدنه، عنده قوت يومه، فكأنما حيزت له الدنيا بحذافيرها

و دمتم بحفظ الله و رعايته :)