عبر عن نفسك .. و دز مسج

الموضوع مهم جدا .. و أرجو قراءته بتمعن .. إذا مالك خلق .. لا تقراه الحين .. روح ريح و رد إقراه بعدين :)

للبيع .. سيارة، شوزن, لابتوب، سيكل .... كل هذا راح يوصل لأتباعك بس .. دز مسج

تغطية حدث معين تكون انت حاضره .. فتحث الناس اللي يتبعونك بمسج واحد فقط .. دز مسج
رايح مطعم و عجبتك أكلة معينة و ودك الناس تجربها .. دز مسج
بنشرت سيارتك .. ممكن تذكر وين و متى .. يمكن يكون أحد من أتباعك بالطريج اللي ذكرته و يمرك يساعدك .. دز مسج
عندك سؤال معين و ودك الناس تشاركك فيه .. دز مسج
بتسوي استبيان معين و تبي أتباعك يشاركون فيه .. دز مسج
نزلت موضوع يديد في بلوقك .. و تبي أتباعك يقرونه أو ينتبهون له .. دز مسج
رزقت بمولود جديد و حاب تعزم ربعك .. مسج واحد كافي يبلغ الجميع .. دز مسج
بتبارك بشهر رمضان أو أي عيد .. فقط دز مسج واحد بقيمة 50 فلس .. راح يوصل لأتباعك كلهم .. لا تتردد و دز مسج
تبي تسوق لمنتج معين .. دز مسج
صار شي مهم في الديرة و ودك تكون أول واحد يبلغ عنه .. دز مسج
رايح مهرجان كبير أو مطعم معين .. و ودك تشوف منو من ربعك بيروح أو موجود هناك .. دز مسج
وقفك شرطي و سحب ليسنك و دفتر سيارتك .. تبي واسطة أو مساعدة .. دز مسج لأتباعك .. يمكن يرد عليك واحد منهم يضبطك .. فقط دز مسج
متوهق و تبي تدل محل، مطعم، أو أي مكان معين .. دز مسج و إن شاء الله أتباعك ما يقصرون .. بس انت دز مسج

بعد هالمقدمة اللي تضيع الواحد، تسألون شنو بالضبط مسج و 50 فلس و مادري شنو !؟

واحد من الربع الله يبارك فيه كلمني عن هالخدمة من جم شهر .. لكن ما بديت أستخدمها إلا قبل شهر و تميت إلى الآن أستخدمها لأنها فعلا ممتعة و مفيدة .. أتوقع في ناس سامعين بهذه الخدمة ألا وهي من موقع
Twitter
بكل بساطة .. تويتر موقع اجتماعي يربط الأصدقاء مع بعض بخدمة الرسائل القصيرة
SMS

تعريف تويتر من موقع ويكيبيديا
عربي
انجليزي

و تتكون من تابعين و متبوعين
Followers and following

التابعين
followers
هم اللي يتبعونك في هذه الخدمة .. أي كل ما تدز مسج من موبايلك أو الموقع نفسه إلى الرقم الدولي راح يوصل المسج إلى كل التابعين حتى لو كان عددهم يفوق الخمسين ألف ! وليش بالذات خمسين ألف !؟ لأن في عدد من مستخدمي تويتر معروفين يصل عدد تابعينهم أكثر من خمسين ألف !

المتبوعين
Following
يقولك انت منو قاعد تتبع .. أي منو قاعد تستقبل منهم رسائل قصيرة .. في حالتي عندي أشخاص أتابعهم من برة لأنهم مصورين أو مقدمي برامج تكنولوجية و رسائلهم فعلا مفيدة بالنسبة لي .. و عندي جم واحد من الربع .. و بإمكانك متابعة آخر الأخبار عن طريق تويتر .. و الاستقبال طبعا بلااااش .. مو قاصين علينا هني .. الاشتراك بالخدمات الإخبارية بمبلغ كل شهر !!
الجزيرة تستخدمه .. و السي ان ان مو مقصرة ..

ماهي أفضل طريقة لاستخدام تويتر ؟
لا توجد فطريقة محددة لاستخدام هذه الخدمة ..فكل واحد يستخدمها بالطريقة اللي تعجبه .. و مثل ما حطيت في مقدمة الموضوع أمثلة توضح بعض طرق الاستخدام الممكنة و اللي طرت على بالي لحظة كتابة الموضوع.

كيفية الاشتراك
ادخل الموقع هنــــــــا و سجل كأي موقع تبي تسجل فيه بعدين اتبع الخطوات اللي راح أقولك عليها ..

الخطوة الأولى

الخطوة الثانية

الخطوة الثالثة

الخطوة الرابعة

الخطوة الخامسة

الخطوة السادسة

للبحث عن أصدقاء أو دعوة صديق غير مسجل في الخدمة

مثال عن البحث .. بحثت بالنك نيم
Kuw_Son


مثال عن متابعة شخص تستطيع متابعته لأنه ما حط حماية لتحديثاته
و باستطاعة أي شخص متابعته و من ثم استقبال رسائل على الموبايل منه


هذه هي صفحته .. و التحديثات واضحة


و لتفعيل استقبال الرسائل من شخص اتبعته حديثا

الخصوصية في تويتر

بقي شيء أخير و مهم للكل .. هل أرقام تلفوناتنا راح تنتشر للكل و تصير هيصة !؟
الجواب بكل بساطة لأ :)
لما تتبع واحد من الأشخاص .. كل مسج يوصلك منه راح يكون من الرقم الدولي مال تويتر و مكتوب في الرسالة مثلا

kuw_son: Hi all, elyoom ra7 a7e6 maw'9oo3 3n twitter, don't forget to follow me

و بمجرد إرسال الرسالة من الموبايل - مع مراعاة الـ 140 حرف - راح توصل إلى جميع تابعيك بمبلغ 50 فلس و انت الربحان :)
طبعا إذا دزيت المسج من الموقع راح يكون في عداد للأحرف و قيمة المسج ببلاش !

و بالإمكان إرسال رسالة خاصة لأحد تابعيك أو هو يدز لك رسالة خاصة عن طرق الموقع يكون سهل .. لكن عن طريق الموبايل لازم تكتب التالي:
d Kuw_Son the message ....

و إذا في أي مضايقات من أحد .. بالإمكان تعطي التابع بلوك إذا مو عاجبك أو قليل الأدب لا سمح الله أو من هالسوالف اللي انتوا عارفينها.

على فكرة .. سويت بحث في تويتر و لقيت مجموعة من المدونين السعوديين - واحد من مشاهيرهم ..المدون ماشي صح - يستخدمونه بشكل ممتاز للتواصل بينهم .. فما بالك لو تواصل المدونين في الكويت و المجموعات ذات الصلة بهذه الخدمة !!

مواقع تهمك عن تويتر

twitter directory
كله إحصائيات راح تفيدك عن مستخدمي تويتر .. و فيه بحث بالدولة و بالإسم و بالنك نيم ..

17 طريقة لاستخدام تويتر .. دليل المبتدئين
موضوع من مدونة باللغة الانجليزية يشرح من وجهة نظره 17 طريقة لاستخدام تويتر تفيد المبتدئين.

إذا في أي استفسار أنا حاضر .. و لمتابعتي على تويتر
http://twitter.com/kuw_son

تحديث
14 Aug 2008

تم إيقاف خدمة تويتر في جميع أنحاء العالم ما عدا أمريكا و كندا و الهند !!
السبب في أن الخدمة تكلف تويتر مبالغ طائلة لقاء خدمات المسجات، و هي بصدد الآن حل المشكلة مع مزودي الخدمة و شركات الاتصالات في باقي القارات

حسافة .. ما تهنيت فيها !
لقراءة الخبر من بلوق تويتر