يسمحون لي أخواتي البنات .. راح أحط عليكم و أطب فيكم عالخفيف .. معليش سامحوني أمون
قبل جم يوم أختي خذت الليسن .. حلو ؟ شي طبيعي الناس تاخذ ليسن و تسوق و و و ..
سألت الوالد الله يحفظه ..
خالد: كلمت أحد علشان يمشيها و لا نجحت بجدارة؟
بو خالد: يوم دشينا على الضابط .. دخل اختك مكان القيادة علشان يختبرها .. راحت غطت نص ساعة و ردت .. الحين وقت الاختبار النظري .. يسألها الضابط .. اللي تعرفينه جاوبيه .. وللي ما تعرفينه خليه فاضي علشان أحله لج !!!
خالد: أكو أكثر من جذي واسطة !!؟
بو خالد: والله ما كلمت أحد .. الضابط بروحه بط الجربة وقال احنا عندنا تعليمات ما نسقط كويتيين !!
خالد: و أنا أقول البنات سياقتهم الله بالخييييييييييير !!؟ أثاري هذي القمندة!؟
يا جماعة .. قيادة السيارة مو لعبة .. أمشي بسيارتي بحال سبيلي ماسك اللاين بتاعي و لا الأخت اللطيفة نايمة علي و جنة الشارع شارع أبوها !! و في بعض الحريم\البنات .. في أمك خير دق لها هرن أو تترك لها !!
أغلب المواقف الدايخة اللي تصير لي من قيادة البنات .. تلاقيها توها ماخذة ليسن و منجحينها غصب .. و ماسكة الحارة اليسار و مجلبة فيها و ما تدري إن جان في سيارة وراها مسرعة بتطوف .. غاطسة في الكشن ولا تلتفت على أحد !!
و لا تييك وحدة ماسكة الموبايل ومنسدحة على كتر .. خو الهاندز فري سلامات .. يومين تستخدمه و تالي قطته يمها !! و من تسولف تنسى انها قاعدة تسوق سيارة !!
أعيد و أكرر .. يا جماعة الخير السياقة مو لعبة .. أنا اقترح أن يتم التشديد على الاختبار و يوضع لهم حواجز كثيرة للتأكد من أن البنت تعرف تسوق !!
تنويه .. ما قلت هالكلام إلا ان التسيب واضح في الادارة العامة للمرور و حدهم متساهلين في قيادة السيارات .. و أآخر شي يحطون لنا لافتات .. القيادة فن و ذوق .. من وين الفن إذا هذول يسوقون !!
ترا الكلام ينطبق على الذكور أيضا بس مو كثر الإناث طبعا !
---------------------------------------
مع أني ما عندي ألف باء الاستثمار أو البزنس .. لكن اللي يدش البورصة لازم يتابع .. و حبيت أحط صورة أخذتها من برنامج التداول .. بس للتاريخ و للذكرى :)
السوق اليوم أخضر فاقع .. مع الإعلان في جرايد اليوم عن قرب دخول المحفظة المليارية للسوق غدا
عسى الله يسهل
40 comments:
لول
ذكرتني بيوم الاختبار مالي
ما بقى شي ما دعمته و ثلاتارباع العلامات ما عرفتهم مع اني كنت دارسة :P
الحين اسوق عدل بس ليلحين ما اعرف اصفط عامودي :/
كاااااااااااااااااك :)
زين سويت فيهم ..!!
انت مو بس طبيت فيهم .. انت قتلتهم !!
بس بيني وبينك ..!!
بعضهم يطلعون مينن !!
اتيلك طيران .. ومخربتها على الاخر !!
وعليها سواقه مو صج .. !!
تقول شوماخر مار عليك مو بنت !!!
وتحياتي ..
ويسلموااااااااااااااااا :)
I couldn't agree more.
السواقه فن بس من الكل يتقنه ; )
و الله يكافينا شر هالحوادث اللي قاعده تصير :x
زوجتي تحن علي تبي تسوق
قلت لها يوبا ليش
حرام عليك
احنا كلنا مليون
استغربت
قلت لها حرام ننقص
نصير شوي باكر
هم كثر
كبار السن من الرجال والنساء
اصحاب التكسي والوانيتات
الباصات
شباب البتوينات
وهلم جرا
هي فعلا حرب شوارع
...........
Enter-Q8
ههههههههههههه
سلط الله على ابليسك
...........
اخي العزيز راجع موضوع الصورة
ويفضل حذف التعليق بعد قراءته
.........
دمت بحفظ الله
القياده تبين مدى ثقافة الشعوب ...أكره موقف عندي في القياده لما أشوف أحد واقف عند خطوط المشاه ومايخلونه يمشي
يا حليلهاااااا صديقتي ;**
الله يحفظها ;)
Slami To her ;p
--
أحس بأن الكل يستخدم هذا الفيتامين ليس الفتيات فحسب وفي كل المجالات هناك فن وذوق والبعض يمتلكه والكثيرون يفتقدونه فلا "تطب" فينا ;p
من وجهة نظري:
أحس بالقهر لمّا أحد ياخذ الليسن بالواسطة وأنغث أولاً لأن مو ويه حق وثانيًا راحت أرواح الناس بسبّة هالشي ومنو المسؤول ؟
إن شالله بشتغل مديرة هناك وأضبّط لكم الوضع لا تحاتون ;p
--
حفظ الله الكويت وشعبها والمسلمين من كل سوء وألهمهم الرشد والإخلاص في كل عمل :)
بوست جميل وعاشت إلي خلتك تبدع فيه ;)
سبحان الله .. موضوع مؤرقني منذ فترة ليست بقليلة ..
أخي العزيز ..
فلنكن واقعيين قليلاً :]
الرجل يقول بأن المرأة "خداي" في القيادة
و المرأة تقول " الهنود " ما يعرفون يسوقون !!
و الهنود " بسمع اذني " يقولون: الكويتيين ما يعرفون يسوقون =)
و هكذا تدور الدائرة ..
لا أنكر بأن المرأة " تغث " عندما تسوق ببرود و غباء !
ولا أنكر بأن الرجل - مهزلة - عندما -يفحّط و يقحّص - و هم للأسف بإزدياد 24 ساعة 7 أيام في الاسبوع و 12 شهر !
ولا أنكر بأن الهنود - هم بلاء- في الشارع الكويتي .. إيييبونهم من ديرتهم يسوقون قواري .. و إيون هنيه =) لكزسس و مرسيدس مرورًا بالوانيتات !!
خنكون واقعيين... القيادة فن و ذوق و أخلاق للجميع قبل أن تكون للمرأة لأن المرأة لم تأخذ الليسن إلا من ظهر ريايييل ;Pp
و انت بنفسك تكلمت عنهم ..
و إن لم تأخذ الليسن
فراح
تكد
عالهندي !!
-
سلامي لملهمتك :)
لاوالله مو حاط علينا ولا شيء
تبي الصج نص اللي يسوقون ما يستاهلون الليسن
ونعم
اكثرهم بنات
الشاب من عمرالمراهقة يسوق صج طايش
بس متمكن
البنات للاسف وايد منهم سواقتهم
خواره
انا وحده ليش صدف عيدميلادي مع يوم الاختبار
الضابط نجحني
بس جذيه هديييييييييييييه منه
:)))
بس الحمدلله اهلي ماقصروا ة وتعلمت عدل السياقة
لما تمكنت
بس تبي الصج
لو ارواح الناس ثمينه بالبلد ماجان عطوا كل الشباب
الليسن بهالسهوله
والله حراااااام الارواح اللي تروح بهالحوادث
انا معاك 100%.. كل ما أشوف سياره امحسره بالناس بالشارع.. اطل ابويها ولا وحده..
مادري من الكبت.. ولا تعنفق.. ولا شحاطه! مادري
كله ظالمينا وبس
وبعدين الضابط قال ما نسقط الكويتيين مو الكويتيات ...يعني احنا وياكم سيم سيم
يا ليت كنا مثلكم
احنا الواحد تطلع روحه عشان يحصل ليسن
ذكرتني بموضوع كتبته
عشر اسباب تمنعني عن السواقه
http://lild84.blogspot.com/2008/07/blog-post.html
يريت تمر عليه ^___^
مع اني بنت .. بس مادري ليش اتيني جلطه يوم اشوف وحده تسوق .. حتى لو من اهلي اقولهم اسمحووولي ما اثق فسواقه الحريم >_< ...
فعلا التشديد فها الموضوع واجب :)
نأسف على عدم الرد حاليا .. حيث أني طريح الفراش
سلامات ما تشوف شر أخوي ولا بأس طهور إن شالله تكفيرًا للذنوب :)
--
أحد قالك تحط عالبنات ;p
سلامات ياخوي .. وماتشوف شر !!
بل .. هذي اكيد وحيده معطيتك عين !!
يامعود اقرا على نفسك بعد كل بوست تحطه !!
الله ياكافي .. قل اعوذ برب الفلق ..!!
وتحياتي .. وطمنا عليك ..
ويسلمواااااااااااا :)
مساك الله بالخير خالد
اقول ابوي انت
اذا احنا البنات نشتكي من البنات
شلون ما نعذركم انتوا يالشباب لين شكيتوا
خلها على الله
وانا مع بو لطيف
ضيف الجماعة اللي ذكرهم
تكمل الطاقه
سلام
والله تبي الصج انا معاك باللي قلته
اغلبهم مايعرفون يسوقون ومو بس من البنات حتى الصبيان
وهم اكو رياييل كبار مايعرفون يسوقون عدل
مع اني ما امتحنت وبس تمشيت بالسيارة وقت الاختبار نجحوني وما امدح نفسي بس والله سواقتي احسن من سواقة غيري والحين ماشاء الله علي ازقد وبالصفطات تقول جني واحد من سنيين كان يقز ويعرف يصفط وهذا دليل على كلامك ان السواقة فن وشطارة مع اني تدربت يومين لكن من خذيت الليسن صرت احسن واحسن يعني الواحد لازم يعلم نفسه بنفسه ولكن مو على احساب ارواح الناس
يعني مو بس تسوق وخلاص!! اذا كل واحد بسوق وبس اهني راح يسبب حق نفسه وحق غيره الحوادث وعسى الله يكافينا شر هالحوادث
واكره ماعندي اللي يتمشى بالخط السريع واللي كل ساعة طاق بريك مع ان ماكو سيارة جدامه او تشوفه كل ساعة مغير حارته ولا شوي الا داش على حارتك ولازق فيك وهالحجي ينطبق عالجنسين
الغلط والرك مو على اللي ماخذين ليسن الغلط عاللي نجحهم وخلاهم ياخذون ليسن
وعسى الله يحفظنا ويحفظ شبابنا وخواتنا
وسلامات وماتشوف شر ان شاء الله
مأجور بأذن الله
ما عليك شر ان شاء الله
Fashionista
المفروض ما ينجحونج على اللي سويتيه وقت الاختبار ..
:)
q8el5air
أووللله أووللله !! شدعوة يبة !؟ شمسوين لك ؟
يبة أنا مو قاعد أتشمت ولا قاعد أعيب عليهم ..
في النهاية هم أختي و أختك و أمي و أمك
الله يهدي الميين منهم سواءا البنات أو الشباب :)
حياك الله
KeChie-ChaN
آمين
Enter-Q8
يا بو المنطق يا انت ههههه ..
الله يكافيكم الشر
أبو لطيف
هذول ما تطرقت لهم في الموضوع مع انهم أحد أسباب كوارث المرور ..
حياك الله
:)
Um ilsa3af wel leef
هني إيي دور الثقافة المرورية و قياس مدى احترام قوانين المرور ..
شكرا على المشاركة
SheLLoO
صديقتج للحين ما نأمن تسوق بروحها بالرغم من ان الوالد خذالها سيارة .. لكنها تحتاج ثقة في نفسها أكبر في الشارع .. و الوالد الله يحفظه مو مخليها تروح بروحها كليتها إلا وهو قاعد يمها إلين ما يتطمن على سواقتها .. و هذا المفروض يصير .. مو تاخذ ليسن بالواسطة و يقطونها في الشارع بين السيارات تدعم خلق الله !!
الكل يبي واسطة وهذا شي معروف علشان تمشي امورك .. لكن أن تكون الواسطة سببا في تعاسة الآخرين - و هي كذلك لما فيها من ظلم - فهذا لا نرضاه أبدا
و المشكلة ان الفتيات لو نجحوا بالواسطة في اختبار القيادة .. ينخاف منهم لأنها راح تكون أول مرة فعلية تسوق في الشارع .. بينما الغالبية العظمى من الشباب تلاقينه يسوق قبل أخذ الليسن بجم سنة !
لصرتي مديرة هناك يصير خير
:P
Khayal Al-Ma'ata
كل من يلقي اللوم على الثاني .. لكن لو أنصف الناس أنفسهم لعرفوا من هو المخطئ و من هو المصيب .. و رحم الله امرء عرف قدر نفسه :)
و لا أنا أنكر أنها تغث ..
و خلينا الحين من التقحص و التفحيط .. لأن الموضوع لا يخص الرعونة في القيادة ..
فعلا هذي حقيقة أن الهنود اللي أغلبهم سواق هني ما كان يحلم يسوق سيارة في ديرته .. و الحين في منهم الزين اللي أكل طراقات على إيد معزبه إلين تسنع و في منهم الخداي اللي للحين مو عارف كوعه من بوعه !
ما علاقة الفن و الذوق بالمرأة !!؟ كلامي كان واضح .. الواسطة في اللياسن هي أساس المشكلة .. و تكثر عند البنات لأسباب وضحتها في ردي على صديقتج أم تقويم
ان شاء الله يوصل السلام :)
Vancouver
أستشهد بكلامج
الشاب من عمرالمراهقة يسوق صج طايش
بس متمكن
سبق و ان وضحت في الرد على الأخت
SheLLoO
عن نفس الرأي ..
أصلا منو ما صدف يوم ميلاده مع الاختبار !؟
:P
الدور الكبير و المسئولية على الأهل .. البنت تحتاج تدريب طويل .. لأن ردة فعلها في الشارع و تصرفها مو مثل الشاب .. التعامل مع السيارات في الشارع يبيله قلب قوي و سياقة الكثير من الشباب في الفترة الأخيرة مثل السباقات .. فالحذر مطلوب ..
فعلا .. ما كو احساس بالمسئولية من قبل المسئولين و هذا ان دل فإنه يدل على استهتار بأرواح الناس ..
Miznah
و شهد شاهد من أهلها ..
:P
يا جماعة هذا كلام البنات عن نفسهم .. أنا ملي شغل .. الحين الأخت
vancouver + Miznah
لايعة جبدهم من سولقة البنات
:P
tekana
من يقول ظالمينكم !!؟ بعد هذا الصج!!
ثاني شي اقري ردي على الأخت
SheLLoO ..
أغلب الشباب ساقوا و تعلموا السياقة قبل الليسن بفترة ..
يعني لو خذاها بالواسطة ما عنده مشكلة :)
كبرياء وردة
ما أدري شنو الإجراءات عندكم في البحرين .. لكن أكيد في مصلحتكم .. لأن القيادة مو لعبة :)
بالتوفيج
SheLLoO
الله يسلمج :)
الصج ينقال
;)
Q8el5air
الله يسلمك .. ما قصرت :)
الزين
مساج الله بالنور و السرور ..
هم هذا صوت ينضاف ضد قيادة البنات .. و من بنت بعد :)
بس علشان ما يتهموني البنات و يقولون متحيز ضدنا
:P
بو لطيف ذكر الفئة الباقية .. لكن ماله شغل بموضوعنا :)
حياج الله :)
BenT BonD
كلامج كله شهادة ضدج أختي .. قولي ليش؟
المفروض يا طويلة العمر .. الجهد المبذول في التدريب لقيادة السيارة يكون قبل الاختبار مو بعد أخذ الليسن .. أفهم من كلامج انج تعلمتي على أفا الأوادم اللي بالشارع .. يعني على ما تعلمتي إلا الدعاوي عليج على أفا من يشيل !!
أنا أعترف ان قيادتي إذا تنرفزت تكون متهورة .. و فعلا أتنرفز إذا واحد جدامي يمشي مثل الحمسة و آخرتها يطق بريك من غير سبب
أنا بخير إذا الله فكني من التنرفز خلال السياقة
كلامج صحيح .. المفروض يشددون الإجراءات و يصعبونها إلى أبعد الحدود ..ن الازدحام بالشوارع صار لا يطاق و كله من كثرة مستخدمي الطرق !
و كل من هب و دب عطوه ليسن ! المفروض يقللون الزحمة من خلال تقليل إصدار اللياسن و راح يفكهم بإذن الله من الحوادث اللي يتسببون فيها الغشم !
الله يسلمج :)
كبرياء وردة
الشر ما إييج :)
:)
ميبي .. والله أعلم السخونة أثرت على االاستيعاب ;p !
سلامات و ماتشوف شر ..
و المقصد هنا الرد على العنوان:
القيادة فن و ذوق و أخلاق :] حتى على أهل التقحص و التبتون .. و الخز .. ووو ما إلى ذلك .. !
و حتى الشباب ياخذون الليسن بواسطات ;)
ماودّي أحنـّج !
بس لأني اشوف بلاوي بالشارع لدرجة إن ساعات أقول -تأسيًا- : ودّي أنذر نفسي شرطي مرور ولو يوم أعدل المرور !!!
* على فكرة وحدة من أهلي قلبت سيارتها لأن واحد كان يبتون و داش بحارة الأمان :) راح الطبيب تعالج و مشى ! و محد كلمه لأنه هامور صغيّر !!
و كل إنسان يتكلم من منظوره الشخصي و من خبراته الشخصية
و رفيجتي أم تقويم - حاطة صورتي موصورتها =] هه !
بالتوفيق ..
Khayal Al-Ma'ata
تصدقين نسيت ان عنوان الموضوع
القيادة فن و ذوق !
يا بنت الحلال سبق و ان ذكرت أن الشباب مو نفس البنات حتى لو نجحوا بواسطة .. لأن أغلب الشباب يسوقون قبل الليسن بفترة طويلة :)
لا تحنجين لو سمحتي
:P
او على طاري الشرطي .. الحين فاتحين كلية لتخريج شرطيات و ضباط نساء .. حيلج فيهم
:P
هامور صغير !! هذا بالول !
فعلا القياده فن وذوق
بس عندنا كلش ما تنطبق هالمقوله
انا معاك في ان اكثر البنات
السياقه الله بالخير
بس عاد الرجال متهورين اكثر منا حتى لو كانوا متمكنين
وان شاء الله دوووم مخضر شبعنا من الاحمر
:)
3afwan inta ga3ed t6eb bel banat 9a7 !!
laish chthe tgool 7aram 3laik e7na shno sweena nthel mesakeen
o b3deen mno gal ena el shabab mga9reen bel seyaga kila msha5ee6 o 6ayreen 7ita lo bel lane el yimeen telgah ybtwen bail el lains o ywaterni o wedi azne6a :@
so el salfa mafeeha genders o la tkoon 3n9eri ;p
P.S that post chna maktoob 3ani
cuz ana nej7t eb was6a o achlb bel yesar o ahather belfone bdoon handfree ;p
o la ana elie a39b 3al nas ;p
أنا نسيت لا أربط الحزام وقت إمتحاني وطوفلي إياها.. غير إن إمتحاني كان مجرد أرد السيارة جير لي ورا و بس !!
يعني لو مو متدربة من قبل جان ما فرقت وياي..
أما عن الشارع .. فالله الحافظ..
أتوقع كل واحد منا يواجه ولا 10 مواقف جدامه تصير بسبة التسيب والإستهتار اللي قاعد يصير وأول أسباب هذي السوالف هي كما ذكرت في سالفة رخصة القيادة..
وطبعا ما أنكر خداي البنات في السياقة :P..
mamloo7a Q8ia
شكرا لصراحتك .. ابي البنت تتكلم عن بنات جنسها و تقول سياقة البنات الله بالخير .. علشان أطلع من اللوية :)
بعض الرجال متهورين و أغلبهم المراهقين اللي توهم ماخذين ليسن واللي توه طالع سينما و توه شايف فيلم أكشن و عايش الدور في الشارع !
Jouja
يا جماعة .. اختنا جووجا مثال حي على اللي قاعد أقوله ..
هي اعترفت بنفسها
:)
مستعدة
و هذا الموقف يؤكد كلامي .. السالفة سايبة .. و يالله الكل ناجح !! ما يصيييير !
و هذي شهادة إضافية من بنت .. شكرا
0f 0f 0f ana 9ert methal 7ay
ويييي خبرك قديم صديقتي ساقت بروحها من زمان وعمي الله يحفظه يقدّر مواهبها مو يحطمها :| ;p
"الله يعينك ترى دقيت عليها وشيشتها" ;p
--
رجاءًا عدم الاستخفاف بقدراتي والاستهزاء بصورتي للمرة الثانية على التوالي ;p
--
صح معاك حق ولكلٍ وجهة نظر ولو بنتحجى عن الواسطة ما نخلص ومو شرط كل الصبيان إلي يسوقون متمكنين أعرف شكثر خوارة وما يسيطرون عالشارع واهما يسوقون :)
موضوع مثير للقرقة ;p
صج لايعة كبدك منا ... بس والله نهون جدام السياق الهنود ... هذيل اللي شادين الظهر بواسطة معازيبهم
:)
احم احم
دشيت بموضوع
دسم
تدري اخوي تخيل لو ماكو حريم يسوقون
اكيد تقول راح يصير نعيم
ماكو حوداث ولا ثولان يسوقون وغيرها وغيرها
وانا اقول لا تخيل
شوف السعودية وتصور
عدد الحوادث والبلاوي والناس التعبانه بالسياقة
اعتقد اخوي ان الرجال هم اسوء في القيادة
واكثر استهتار
وطبعا الي يزيد الطين بله
انهم كويتيين
يعني
انهم مهمين ولازم يوصلون بسرعه ولا احد يوقف جدامهم
عفية شعب كله مهم
عموما بوست ممتع
آنا على يوم بصنف الناس اللي تسوق بالشارع إذا الله احيانا
ياليت بس هالنماين اللي تقول عنها
3 اصناف يطفروني
باص يمشي ويلف على كيفه وماله شغل باحد
وناس يقطون روحهم بالشوارع وتالي يطقون اشاره هذا ان طقوها أصلا واعترفو فيها
وناس يطقون اشاره يمين ويلفون يسار !!! لا ويخزونك ان ماعطيتهم مجال ؟
الرجال محترمين في القيادة
بعكس الفتيات
تخّيل عند الدوار الأولوية لك
تلقى سيارة تعر عليك
تجدها فتاة
عند اللفة فوق تحت سيارة تأتي مسرعة تغطي الرؤية عليك
تجدها فتاة
عند الإشارة هرن يبط طبلة أذنك
تجدها فتاة
شارع داخلي دايسين 100 ولاهييين بشي غير القيادة
تجدها فتاة
وكثير كثير
:)
الوضع معاي مختلف, والدي مسؤول كبير في الداخلية كان بإمكانه اييب لي الليسن من غير اختبار قيادة لكن بهالمسألة الواسطة ما تنفع وهالشي يتعلق بأرواح ناس
الطريف بالموضوع إني ما سقت إلا بعد ما أخذت الليسن بـ 3 أشهر وبعد اختبار فظيع قامت به والدتي الله يحفظها
وصج القيادة ذوق
اعرف شخصيّة الإنسان من طريقة قيادته
أضيف للعنوان
كما تعلمنا
القيادة فن وذوق + أخلاق
في أيامنا هذه
عدم الفن
عدم الذوق
عدمت الأخلاق
لا أريد أن أعمم وفي الوقت نفسه لا أريد أخص
بنات جنسي فيهن وعليهن
الجنس الآخر لهم وعليهم
وان كنتَ ترى أن ما علينا أكثر مما فينا
ان شاء الله أضاف الى قائمة الأناس
الذين يمتلكون ليسن بعد يومين..
تحياتي
لااا ماقلت اني تعلمت من افا الاوادم
تدري انا اصلا من اول يوم تدربت جان تقولي المدربة بس خلاص انتي مايحتاي انج تتدربين اكثر لانج تعرفين وقالت راح اعطيج يوم ثاني بس جذي عكس اختي اللي اكبر مني دربتها 3 ايام
يعني طلعت اعرف اسوف بالفطرة مع اني ماسقت من قبل الا مرتين بسيارة ابوي وكل مرة حدي حدي اطلع وادخل سياييرهم البيت
واصلا انا اللي قاعد ادعي عاللي يسوقون حوالي لما اتنرفز من سواقتهم
Post a Comment