Saturday, April 14, 2007

from Kuwait !!!!?

في يوم المطرة الجميلة .. يوم الخميس بالتحديد .. كنت في بيت يدي أتغدى .. و فجأة السما صارت سودة ماشاء الله من الغيوم .. خلصت غداي و لحسن الحظ كانت كاميرتي معاي .. قلت ماكو إلا مجمع الكوت .. يسوى أصور فيه منظر حلو مع الغيوم ..

وصلت الكوت و خذيت كاميرتي معاي .. طبعا من نزلت من السيارة إلين مشيت و عيون الأمن علي !! ما أدري وين داش أنا منطقة عسكرية !!

المراد خذيت لي جم صورة بس ما عجبني الغيم لأنه كثيف و صاك حده .. يبيله غيم مفرق علشان تطلع زروقة السما و تشكيلة الغيوم الساحرة ..

توني بمشي ولا مجموعة هنود قاعدين يصورون .. شافوا كاميرتي .. قالوا هذا شكله مصور .. سلم واحد منهم علي و قال ممكن تصورنا بكاميرتنا .. قلت أوكي ماكو مشكلة .. تفضل انت و ربعك صفوا يم بعض علشان أصوركم ..

عقب ما صورتهم .. قلت لهم وقفوا لحد يتحرك .. بصوركم بكاميرتي .. والله و خذيت جم لقطة و وريتهم الصور فاستانسوا .. سألني واحد

whats your name?

I said: Khalid ..

He asked also .. from where?

I said .. from Kuwait

He was surprized !!

تفاجأ الحبيب و ربعه اني كويتي و قاعد أصور و اللي أكثر من جذي اني معطيهم ويه .. ما أدري هالهنود ماخذين فكرة غلط عن الكويتيين انهم مدقرينهم و لاعنين أبو أسلافهم بالنكت .. أوكي ميخالف النكت ضابطة عليهم و ما أنكر .. لكن المعاملة هي الأساس ..
الحمدلله أنا واحد زين مع الكل سواء هندي و لا بنغالي ولا مصري ولا اي جنسية .. المعاملة هي الأساس عندي .. شلون تكسب قلوب الناس !؟ أكيد بالمعاملة الحسنة ..

تذكرت قول الشاعر :

أحسن إلى الناس تستعبد قلوبهم
فطالما استعبد الإنسانَ إحسانُ

بعد ما شافوا الصورة قلت له عندك إيميل؟
قال عندي و عطاني إيميله و قلت له بدز لك صورتكم ..

تشكر مني و استانس حده و أدري انه متفاجئ حيل .. و علامات التعجب على ويهه واضحة ..

توني بمشي جان يقول واحد منهم نبيك تصور معانا ..
وقفت و صورت معاهم و تشكروا مني ..

و طلعت من روحتي لمجمع الكوت بانطباع جميل .. اني أدخلت سرور لقلب إنسان و تركت انطباع حلو عنده يمكن عدل مزاجه اليوم كله ما أدري .. بس المهم كسب قلوب الناس ..

و هذي الصورة اللي دزها لي .. و هو ثاني واحد من اليمين



و دزلي إيميل ..

Dear Khalid
it was a surprising event for me and friends we never see a kuwaity friend like you., any way the snap is really fantastic appreciate ur talent and thanks for your cooperation. we enjoyed our photo that u took in our camera also i will snd that snaps along with this mail . any way nice to meet u khalid
we expect ur support in kuwait if possible kindly give ur mobile number and address
thank you
mail me if u r free
have a nice day
sanoj
mob - 642xxxx

و شاد حيله .. يبي موبايلي و عنواني .. تهقون أعطيه !؟
------------------------

و هذي بعض اللقطات اللي خذيتها من مجمع الكوت يمكن قبل أسبوع أو أكثر .. و هني راح تعرفون قصدي شنو يعني غيوم مفرقة و سماء زرقاء !!




و هذي بعد




و أخيرا .. أرفقت لكم مقاطع مضحكة واصلتني بالإيميل و أنا قاعد أكتب البوست ..

3 Years Old Kid Vs. Monster

Blood

و دمتم بفرحة

42 comments:

(روح) said...

انا اللي فرحت و الله لما قريت البوست :)

وذكرتني بنقاط منها :
-الناس في مختلف مجتمعاتهم، لا يستغني بعضهم عن بعض،

ولا يترك بعضهم التعامل مع بعض للاستغناء،

-إن كل مهنة وصنعة، وكل فرد في المجتمع،

كل في حاجة للتعامل والارتباط مع النوع الآخر

هذا التعامل لا يستقيم، ويرتاح إليه الناس، في شئونهم الخاصّة والعامّة،

ما لم يقم على أسس من التفاهم، وحسن الأداء،

والصدق والأمانة، (ولطافة اللسان) والثقة المتبادلة.


- فعليك أن تعامل الناس بالرفق واللين والإخلاص، وتمحضهم النصح،

فإن الرفق ما كان يماثله شيء لأنه يريح القلوب، بأكثر من المال،


- لا تحتقرن مَن دونك، ولا تفتخر بما عندك من مال، ولا بعقلك،

وعليك أن تعرف قدر نفسك, وقدر من تتعامل معه،

وأن تنزل الناس منازلهم، وعامل كلاً بحسب درجته ومكانته.


- عليك في تعاملك مع الآخرين أن تضع هذه الحكمة بين عينيك:

عامل الناس بما تحب أن يعاملوك به.


....

جزاك ربي الخير..أستاذ خالد..

وكثّر من امثالك..

بجد..
حين نقف بين يديه سبحانه..كلنا سواسية
وابسط مثال هو صلاة الجماعه..
وفريضة الحج..عسى ربي ييسرها لي..


أدري شطحت بعيد..بس موضوعك جميل
وثري بنقاط مهمة..


ارجع اقول ربي يجزيك كل الخير..


(f)

Seema* said...

عامل الناس كما تحب أن تعامل ..قاعدة قديمة اتخذتها في تعاملي مع غيري : )

أحياناً تكون المواقف بسيطة و موجزة الا إن صداها خالد ممتد =)

it's really nice of you to show them your respect and giving them a grea impression about the kuwaity people ..!

و عن الصور بصراحة استاذ ..شويه عليهم الكلامـ فبكتفي بالمتابعة .. جد روعة ~

*9a7iB el.blOod NeKTa ..shtheGelha 3ala lsaNa o wa3alaYa meshta6 wehwa yGOlha : NOT FUNNY ;P

bojsoom said...

هذا العشم فيك يا بووليد ، نعم الأخلاق ..

ووايد تصير معانا هالمواقف ، لمه نعامل الغير معاملة طيبة ، خاصة الوافدين ..

وإنما الأمم الأخلاق ما بقيت
فإن هموا ذهبت أخلاقهم ذهبوا

وصور روعة ماشاء الله شي قوي ..



" يقولون شاري كامرتك فوق الألف .. شرايك تكتب موضوع عنها ومواصفاتها وكل شي ... ومنكم نستفيد :) "

بوجسووم

albandry said...

ماشالله عليك الله يثبتك ويحفظك لشبابك

اولا شكلك زلمة عشان جذي ماهقو كويتي وماينلامون رايحين الكووت ويتوقعون ناس تعطيهم ويه هذا اذا ماطقوهم هناك
كااااااااااااااااااك


مشكوور والصور من غير ماقول اكيد روعة
الله لا يخلينا من موهبتك الفذة

QiYaDiYa said...

كنت ناوية ارد على البوست ..
بس لما شفت الياهل بعد عمري مشتط على الدم فصلت ضحك ;p

و شلون يزف الي يصور ..
not funnyyyyyyyyyyyyy ;p

والله كسر خاطري مسكين ..

---------------------

بالنسبة الى المعاملة ..
شي جميل جدا انه الانسان يكون راقي باخلاقه و تصرفاته مع الناس ..
و هذا الشي من دينا الاسلام ..
مهما كانت الجنسية لكن الاسلام اهو الي يجمعنا ..
يعني شوف في عصر الرسول عليه الصلاة و السلام ..
و تدقق باسماء الصحابة ..
صهيب الرومي .. بلال الحبشي .. سلمان الفارسي ..

و غيرهم كثير ..
لكن الاسلام جمعهم تحت راية وحده ..

و تذكر احنا مو بس نمثل وطنا فقط .. نمثل دينا الي علمنا على الاخلاق الفاضلة و الانسانية ..


شكرا لك على الموضوع ..
والله يكثر من امثالك ..
و عذرا على الاطالة =)

3ateeja said...

لالالالا عطه يستاهل انا امووووت على لهنود ....بس ليش لابس نظارتك وانت تصور ترى تخون الصور معاك ساعات ....على بالك الصوره زينه تالي تطلع لالالالايت ...

Kuw_Son said...

روح

تعليقج أفرحني اكثر ..

و تذكرت حديث الرسول صلى الله عليه وسلم:
الذي يخالط الناس و يصبر على أذاهم خير من الذي لا يخالط الناس و لا يصبر على أذاهم .. أو كما قال

و لا شك بأن الدين المعاملة .. لا ننسى بأن الاسلام انتشر في كثير من البلدان بالمعاملة الحسنة و الأخلاق الطيبة ..

عسى الله ينفع فينا الناس

و جزاج الله خير .. ما شطحتي عن الموضوع .. أثريتيه بشكل كبير

KeChie-ChaN

That was my iadea .. showing them respect .. and really I didn't make it .. its my nature to act like this al7mdlelah :)

خالق الناس بخلق حسن ..

و الفيديو ... هههه حده مو طبيعي

Bo jasoom

ما عليك زود الله يسلمك ..

و لا بد من التعامل مع الناس بهذه الطريقة .. انت تحب الناس تعاملك بطريقة زينة لابد انك تبادلهم بنفس الطريقة ..

و أتذكر المقولة الشهيرة ..

كن كالشجر يرميه الناس بالحجر و يرميهم بالثمر

حتى لو أساء الناس معاملتك .. اصفح و استشعر عظمة أجر الصبر على أذى الناس ..

و كاميرتي بألف !!؟ أنا أقول 4000 أحسن هههه .. شدعوة يبا ليش ألف ..

ترا سعر الكاميرا 260 دينار و عدساتها اللي شريتهم بعدين حول الـ 500 دينار تقريبا و بس ..
:P

Kuw_Son said...

albandry

آمين و يخليج لعيالج

شكرا .. أتقبل الضغاط !! أوكي أنا شكلي زلمة
:P

و أدري زين ما ينطقون ..
But it shouldn't be the default case :)

و موهبتي تتطور بمتابعتكم و نقدكم طال عمرج ..

شكرا أختي

qiyadiya

الياهل بصوب و البوست بصوب .. حبينا ندخل السرور على قلوبكم ..

ما أطلتي أختي الكريمة .. التعليق أكثر من رائع و مشكورة

3ateeja

والله أخاف أبتلش .. كل شوي داق علي و يمكن يبيني أطلع معاه !؟ ولا أتعشى معاهم أو أروح سينما معاهم !!؟ لأ عاد أنا مو لي هالدرجة أكون صداقات و ما أرد الناس !!

باجر يبي يطلع ليسن حق ولد عمه ولا يبي إقامة حق أمه .. شيفكنا منهم عاد ههههه

لا أنا أقول خليني على الإيميل من بعيد لي بعيد أحسن :)

و منو قالج اني أصور و أنا لابس نظارتي الشمسية !!

أكيد راح تطلع الصورة مختلفة لما أشوفها .. لا تحاتين أقطها لما أصور :)

Tekana said...

ماشالله عليك روحك حلوه.. بس ليش الهندي حده استغرب انك كويتي ..لي هالدرجه ماخذين عنا فكره مو زينه. طبعا الصور روعه ما فيه كلام :)

Unknown said...

خووووووووووووش ولد
انا قايل
انك خوش ولد
وجذى فعلا البنى ادم المفروض يكون
احترام
وتعامل مع الناس بسواسية واخلاق

وبعدن انت اى واحد فيهم :P
اتغشمر

ويعطيك الف عافية

glomhilda said...

السلام عليكم،،

بارك الله فيك أخوي خالد..الدين المعاملة والمفروض مانقلل من شأن أحد كما يفعل البعض مع الهنود ويقومون بإستحقارهم والإستهزاء بهم فقط لأنهم هنود أو فقراء..
هذا لا يجوز..ماكو أحد أحسن من أحد إلا بالتقوى..
وكل أعمالنا محسوبة علينا..فلذلك شو راح نخسر إذا إبتسمنا في وجه الآخرين بغض النظر عن جنسياتهم وحاولنا مساعدتهم..

سبحان الله قد يكون هذا سبب في دخولهم الإسلام إذا لم يكونوا مسلمين..
وتكون أنت السبب الذي لأجله أحبوا هذا الدين

يمكن إنت تشوف اللي سويتوا معاهم بسيط ولكنه عند الله عظيم..فقد أدخلت السرور في قلب إنسان

لا تحقرن صغيرة إن الجبال من الحصى


جزاك الله خير أخوي خالد وعسى الله يبارك فيك ويكثر من أمثالك..

بس ماقلتلنا إنت من فيهم ترى كلهم متشابهين ^____________________^

wallah kidding =)


"وعاملوا بمثل ما عوملتم به"
حتى لو الطرف الثاني أساء لنا المفروض إن نطبق هالآية:
"إدفع بالتي هي أحس"

Q8links said...

عاش مصورنا

ترى هالشباب اللي مصور وياهم مبين عليهم زغرتية وشغل عدل، يمكن مهندسين في إحدى الشركات أو شي من هذا القبيل

وعلى فكرة، أنا بعد طاق صحبة مع الهنود اللي عندنا بالدوام، بس الصراحة المهندسين منهم أصحاب فكر وثقافة لا يستهان بها، تعلمت منهم وايد

يعطيك العافية

SAJA.S said...

خوش ريال.. الله يعطيك الف عافيه ويكثر من امثالك

اللي اخلاقه كريمه يفرض احترامه سواء كان هندي والا كويتي

اسألني ... خبيره بالجنسيات

ههههه

سالفة يوم الخميس .. بس عقب المطر صارت السما حلووووه زرقه .. هذا في جنوب السره
يا حلوها

Kuw_Son said...

tekana

الحمدلله هذا من فضل ربي
و الصور تحلى بآراءكم و انتقادكم .. الله يعطيج العافية

Mishari

جان يستحي بو وليد

:P

ما عليك زود يا مشاري

أنا طال عمرك أول واحد من على اليسار
:P

الله يعافيك وحياك الله

glomhilda

الله يجزيج خير إضافة قيمة بارك الله فيج ..

و أنا واحد بينهم .. ماكو فرق كلنا أوادم
:P

ََQ8Links

انت شايف جذي ؟

إذا فيها خبرة و استفادة ليش لأ .. المهندوسون على أشكالهم يقعون هههه
ان شاء الله يفيدوني بمجالي :)

ٍٍStock said...

هلااااااا بو وليييييد شلوووونك

ادري انك تشرفت بوجودي بين ثنايا بلوقك


تصدق عاد ضابطة الصورة وصاير واحد منهم ما فرقت بينكم :)


كل شي باجره طال عمرك والله يكثر من امثالك


تعال ذكرتني

حبيبي سالفالفه شصار على طلبي؟؟؟

موفق ياللخمه ..........انت قلت تتقبل ضغاط كيفك عاد

اما انا عاد وايد حساس وما اتحمل :)


يمكن ابجي

لوووول

ٍٍStock said...

سالفالفة يعني شالسالفة :)


النقاط والاماكن سقطت سهوا


تبي فلافل :)

7osen said...

يعطيك الف عافيه على

حسن اخلاقك وتعاملك مع الناس

هذا اهم شيء يتحلى فيه الانسان

التعامل والمعامله الحسنه

دمت بكل رقي اخلاق

May said...

حلو الواحد يترك بصمة حسنة مثل كذا

شيء يفرح

ويكسب شي كبير بتعامل بسيط ما يكلفه شي

أهنيك على أخلاقك العالية

Anonymous said...

wallah ma aloom houm ya khaled...sij e7na abadan ma na36ehoum wayh!!!

ow hatha alshay 3eeb 3alena...cuz ehma fi deratna...ya3ni ween wajeb altheyafa :D

ow wayeeed mashkoor...you made all kuwaities look nice

bas lesh chethie...sarli eshkether aftar bel blogs..adawer 3ala sowar albredy...lesh ma sawartah :|

Kuw_Son said...

Stock

طاع هذا عزم روحه بروحه و صار المكان مكانك بعد !؟

لا يبا أتغشمر معاك يا الخثاق العود
:P

سلملي على أم الربيان و ما أبي فلافل

7osen

الله يعافيك يا أخوي و شاكر لك مرورك الكريم

miami

شكرا أختي :)

ghasheema

كلامج صحيح .. لازم نكون صورة حلوة عن ديرتنا و عن عيال ديرتنا ..

وين بردي الله يهداج ما حاشنا شي كلش بمنطقتنا !!

احنا الظاهر خارج منطقة التغطية
:P

bo 3omar said...

كبير يا بو دلال باخلاقك

بس متى عزيمه ستوك لاني ودي اكون ثالثكم

الرجاء الرد بسرعه

charisma said...

خووش بوست

الحين الكويتيين على بعضهم بعض يموقون تبيهم يلتفتون على هنود

الى مثلك وشرواك قليليين ترى

ترى بعد اذنك بقت الصور

اذا ما ترضى عشان اردهم مكانهم

هههههههههه

انا حاليا حطيت وحده خلفيه لاب توبى

كيفك عاد
:)

Kuw_Son said...

هلا والله بو عمر .. بس أي بو عمر فيهم .. ترى وايد ربعي بو عمر .. !!

المشكلة انكم ثلاثة في الدوانية وكلكم بو عمر !!

و توني قاعد أكلم ستوك يقول أي عزيمة !؟

لا تألف ترى الريال ما عزم أحد :)

و حياك الله

Charisma

الله يسلمج أحرجتيني .. إن شاء الله في غيري وايد

و ثاني شي أي صورة فيهم !؟ أنا حاط ثلاثة ملوت الكوت و صورتي مع الهنود

و حلالج بس بغيت أعرف أي صورة
:P

qesat_5ayal said...

التعرف على الجنسيات الأخرى
ومعرفتهم بكوني كويتي والصدمة اللتي تلتحق بهم بعد ذلك .. كله حلو ومعروف

للأسف ان الفكرة خاطئة عن الكويتيين وصارت الفكرة عامة

وذلك لأن قلة قليلة خربت

ذكرتني بموقف طوييل ينشف الريج مع واحد هندي متكلم .. كنت أناقشه

فكرته خاطئة حدها

لكن التجربة بحد ذاتها جميلة ..

ربما اسرد الموقف في مدونتي ان توفرت الكلمات

بارك الله فيك

Nora said...

عندنا و عندك

معاك اخت تمشي و تسولف مع مكسورين الخاطر

ما ادري لي اليوم
من قال اني سفيرة الكويت ؟

بس لما اروح مكان .. والله ربي شاهد
لا تضحك

احس .. لازم نغير الصوورة هههههه

فا جدا جدا فهمت الموقف
بس انا عاد اذا انبهروا استعبط انه هااا ليش متعجبين ؟

و ادخل لهم من اهني .. و يصير شرح عن المجتمع الكويتي الأصيل

ههههههههههه
حدي اشتط ابيه كسرت خاطر نفسي
:)

اييييييي عطه و احتسب الاجر
ترى ابسط شي عندك ككويتي
يكون صعب عليهم فااا ما تدري

charisma said...

ههههههه
خالد يعنى اكيد ما حطيت خلفية جهازى صورة الهنود
ههههههههه
شرايك
:)))

حطيت يا عزيزى الصورة الثالثه
الى فيها الحاجز الى من صخر على امتداد البحر ومبين البحر من الجهتين
ومنظر السما فوق مو طبيعى
وايد وايد عجيبه الصوره
وابعادها
وايد حبيتها

تسلم ايدك

عــــــابره said...

الحين تمثل شباب الكويتي عندهم

واعطيتهم صوره حلوه عنهم .. جزاك الله خير

مافي احلى من البساطه بتعامل

وشكل الهنود هذول راقين شوي مو مثل العماله الي يجون لنا

مافيها شي اشوف لو تكون صداقات معهم

من باب التعرف على الشعوب .. :)

صور جميله جدا .. وهل لهذا من كلام

يعطيك العافيه

::heba:: said...

البساطه اجمل ما يمكن ان يتحلى بها الانسان
...

استغرب من الناس الي تعامل الغير من الجنسيات الاسيويه بأسلوب همجي...او الاستخفاف فيهم....

اهم بشر واحنا بشر ....
وكل من يعمل بطيب اصله...
ولانك طيب واصيل ...كانت رده فعلهم لك جذي....:))

عسى الله يسعدك دوم ويفرحك :")

::heba:: said...

اي على فكره الصور خيال مشالله عليك
فعلا ابدعت ... نسيت اذكر هالشغله ...
:D

§eVeη said...

هلا ستوك والله ضحكتني عالفلافل
انا رابعكم متى يوم الاربعاء؟

بوعمر يوم الاربعاء يناسبك؟

بو دلول انت مدرسه واخلاق
كبير يا خالد

qesat_5ayal said...
This comment has been removed by the author.
nEo said...

عجيب تعاملك مع الهنود


تنم عن تربية و اخلاق عالية مو غريبة عليك


و صورك جميلة تعكس ايضا عين و رؤية فنان


عجيب يا م.خالد

Hitman1 said...

Dude, you got the right attitude towards people and other cultures. I really liked what you did with those guys.

By the way, you said the day had thick clouds, yet the picture with the indians shows clear blue sky!!

Sniper 55™ said...

mashallah ta9werek wayd 7lo ..
what model is your camera ?
why not give him your fone number :)

Kuw_Son said...

qesat_5ayal

الله يبارك فيج .. و في انتظار السالفة مع الهندي

a7la eng

أحلى شي تسولفين مع هالناس .. تحسين بمدى بساطتج كإنسانة تقدر مشاعر الناس ..
و إذا في نفسج شي من الكبر راح يذوب مع مصادقة هؤلاء الناس .. أنا أرى أنه أفضل علاج لمرض الكبر و الغرورو التعالي على الناس

و عطيته رقمي من زمان

Kuw_Son said...

charisma

عليج بالعافية :)

والله يسلمج

my sold

و يجزيج خير مثله

و يعطيج العافية و هذي فرصة انك تتعرف على ناس جدد ..

heba

دايما تسعديني برأيج و تفاعلج مع الموضوع .. و ماعليج زود يا أختي الكريمة

الله يسعدج دنيا و آخره ..

و شهادتج عن التصوير أعتز فيها .. شهادة فنانة مبدعة لها أعمال راقية

Kuw_Son said...

abdullaa

هلا والله .. اليوم حجي اليوم يوم الأقرع .. راح يعشينا فلافل
مساع أكلمه بالمسنجر يقول بكيفكم انتوا عزمتوا روحم بروحكم !

شدعوة يباااااااا تياااح كله فلافل !!

لا تخلونه اليوم حيلكم فيه لين يعشينا

نشوفك في الديوانية

neo

ماعليك زود يالحبيب .. يسرني تواجدك و متابعتك :)

Hitman1

I like doing that with foriegn people all the time .. even with the servant in my office or at home .. I feel good when doing that .. thanks for your comment ..

and the picture over there were taken two weeks ago before meeting those indians :)

sniper55

Thanks brother .. i'm using Canon 350D ..

san3a_wa_laken said...
This comment has been removed by the author.
san3a_wa_laken said...

الحمدلله ان في ناس سنعه ... ماكو احسن من شخص يعامل الكل في نفس الطريقه ونفس الاسلوب
وشنو اجره كبير عن رب العالمين

بوست حلو .. ويدل على تربيتك السنعه والاخلاقك العاليه

Kuw_Son said...

san3a w laken :)

ما عليج زود .. الله يسلمج :)

الحارث بن همّام said...

طول عمرك خلوق وقلبك أبيض يا بوليد ..التواضع صفة نادرة هالأيام .. عسى الله يكثر من أمثالك

Kuw_Son said...

ماعليك زود يا بو طلي :)