قد يستغرب القارئ الكريم من العنوان الماصخ .. لكن مع الغوص في أعماق الموضوع ستتضح الصورة إن شاء الله ..
كعادتي اليومية في الدوام .. أطق فرة على المدونات و أعلق على المواضيع الجديدة .. شدني موضوع خلاجين فيرجن كتبه أخوي مؤيد في مدونته، طبعا أنا طقتني البوهة لما عرفت ان فيرجن تم إغلاقه !! صباااح الخير يا خالد توك تدري هههه !! أظن السالفة انكتبت في الجرايد و أخذت من الزخم الإعلامي ما أخذت لكن توني أفطن لأني ما شفت الجرايد من أسبوع أو أكثر !!
بحثت في جوجل عن الموضوع نفسه لفضولي الزايد لمعرفة تفاصيل الخبر .. وصلت إلى مدونة واحد من الناس حاط الخبر من أحد الجرايد الكويتية أظنها كويت تايمز و الخبر بالانجليزي .. المهم بعد قراءة الخبر .. حبيت أكمل قراءة الموضوع اللي وراه في نفس البلوق ..
هم شدني عنوان الموضوع .. قريت الموضوع وفحواه انه يقارن بين أغنيتين سخيفتين و حاط الأغاني للسماع و الشماتة و قوم يا خالد من اللقافة و شغل الأغنية .. شفت ان السالفة فيها لوود و انتظار فوقفت التشغيل و نزلت البراوزر و قعدت أشتغل على شي ثاني .. شوي ولا
عرق ماااااااا بـــــشرب !! أووووووف شنو هذا حسبي الله على إبليسك !!؟ و يلعلع الحبيب و أنا أسمع الكلمات و ويهي قام يقط ألوان !!
نوعها هشك بشك و مسخرة و الصوت عالي .. و من الخبصة طفيت الشاشة و ما سكت !! رعصت دقمة التشغيل لمدة ثواني علشان أطفي الجهاز بكبره .. شوي ولا يطفي .. أوووووف يالله غربله !! ما بغى يسكت لا بارج الله فيه .. ثواني جان يشتغل الجهاز و يرد يلعلع .. آآآآآوبووووووك لا بوووك و هالمرة فزيت و طاح عقالي و من الفشلة شلعت كيبل الشبكة ما أدري ليش و شلعت وايرات الشاشة كلهم و ما سكت !! والله ماكو إلا أمصع كيبل الكهرباء من عرجه .. يالله انقمت !! بللللل
و أتلفت يمين و يسار أشوة ماكو أحد يمي بس الصوت يسري و جنه العيد إلى غرفة المدير لأن الأرضيات سيراميك .. و نطرت شوي محد ياني و سأل عن هالمهزلة اللي صارت ههههههه ..
تستغربون ليش ما سكت الصوت اللي المفروض طالع من الشاشة ؟ لأن في سماعات داخلية في الجهاز يطلع منها الصوت ما أدري ليش متحول الصوت عليها .. هذي مالها حل إلا إنك تسكر البرنامج اللي قاعد يشغل الصوت أو انك تفصل الكهرباء عن الجهاز و هذا اللي حصل من الخسبقة !!
يوم هدت الأوضاع .. لبست عقالي و قعدت على حيلي .. ركبت الوايرات مرة ثانية و شغلت الجهاز .. لوج إن للوندوز و كل شي تمام للحين .. طلع لي مسج
From Firefox browser asking me:
Do you want to restore your previous sessions?
سألني تبي ترد تشتغل على المواقع اللي كنت فاتحها قبل إغلاق الجهاز بشكل مفاجئ؟ قلت أوكي .. تبطلت أربع مواقع و نطرت تسوي لوود .. شوي ولا عرق ما بــــشرب آآآآآآآآآه .. و صووووووت عالي !!
عاد كان في موظف حولي طاقته البوهه !! و أنا ويهي قام يقط ألوان ..وعينك ما تشوف إلا النور .. ماكو إلا كيبل الكهرباء .. أسرع حل .. والله و أمصعه من عرجه و أتلفت .. ياااااااه إحراج ما بعده إحراااج !!
أنا مستغرب شفيني ما سكرت البراوزر وافتكيت !؟ والله متعومس و ما قدرت أتصرف من الإحراج !!
توووووبة الحين أوافق على استئناف العمل على نفس الصفحات .. شغلت الجهاز و جنه قاعد يضحك علي .. أحس أنه استحى على دمه و بطل يلعب معاي ما سألني مرة ثانية لأنه اللي صار فيني مو شويه !!
الله لا يطيحكم بموقف مثل هذا .. أحمد ربي ان كان وقت ميت ما حولي أحد و لا جان علوووووم
40 comments:
والله و انا اقرا ميته من الضحك ;p
ما سوت عليك هالفيرجين ;p
لو كان في كاميرا بالمكتب يطلع خوش فيلم ;p
موقف محرج لا تحسد عليه الصراحة ..
و تعيش و تاكل غيرها ;p
بجد قعدت اضحك
حركات وشخصية
وفجأة العقال يطيح
والدنيا تتناثر
انا مع قيادية لكن ودي
يكون فيه فعلا كاميرات
ونلاقي بكره تصوير
موظف مخرب للأملاك الخاصه!
وعلى التوب داونلودز
ياليت و الله
(أول مرة احس نفسي شريرة لهالدرجه)
*أخيرا مابغيت تنزل شي بعد موضوع الابل*
:>
(F)
lol @ heshek beshek
allah y3nich bro...thats sooo embarrassing...I really hope ur supervisor didnt hear ur music :P
bas sij moseqat hal ayaaam...7aaaadaaaaah maskhaaarah
and its not even nice to listen to...la music wala kaleemat..ba3d 3ala sheno hal khab9a
ow enta thani mara deer balik....mo kel ma ykolek shay al browser u click ok :P
hehehehehe :D
قطة العقاااااااااال
مو هينة
فيها قباااااااايل
;Pp
فضولك صعب يا اخي حاول تلجمه
خاااصة اذا فيها عرق ما بشرب
ههههههههههههههههههههههههههه
ويعوووو شلون قلتها انا ما ادري
!!
Qiyadiya + روح
مخربين !! تبون كاميرات بعد !!؟ لا بالله رحنا ملح ..
موقف محرج جدا
لا تظهر الشماتة بأخيك فيعافيه الله و يبتليك
:P
على يوم بتصير فيكم دقة .. حوبتي
والا عرق ما بتشرب :)))
اذكر واحد بالغزو اربع وعشرين ساعه حاطه يمه بالشارع ويلكه
لوووول
المهم
عزيزى فيرجن تسكر بعد عدة مخالفات بالنسبة للكتب انا مع ان الواحد يقراه اللى يبى ولكن بطريقة ادبية وعلمية
بس اذا كان الموضوع عرق ما بشرب ومن اللى سمعته هم الشغلة كانت بسبب افلام dvd
مو مقطعه فيستاهلون
هاهاهاهاهاها
خالد والله ضحكت السنه بساعه
:pp
موقف موطبيعي الصراحه ورده
فعلك اهي الي ضحكتني :ppp
ابيه استغفر الله ...الله لايواخذني
على هالضحك الي ضحكته
:p
تعيش وانشالله ماتاكل غيرها
:]
ghasheema
la la la don't worry .. m7d shaf :)
w 7adha now adays music is mas5ara eb ma3na el kelma !!
w ishalla i'll be careful marra thanya :)
a7la eng
أهم شي فيها قبايل
إي والله الفضول ساعات يودرك !! لازم أشوف له حل :)
:P
اخوي خالد انا الفضول مرة بغى يسبب لي اجهاض وانا حامل بدانة
بسبة لنك ضغطت عليه و خرعني :)
بس صدقني اغنية عرق مابشرب وايد اهون من اللي سمعناها في احد المطاعم الشرقين بلندن ... ماتذكر كلماتها بالضبط
لكن اللي يغني كان يحب كل شي غلط
و بما معناه كان يقول
احب الكوكايين و مادري شنو بعد استغفر الله العظيم !
الله يهدي الجميع يارب و يهدينا وياهم :)
Mishari
أنا تومي أدري .. الخبر طلع بايت !!
ما همني سكروه ولا لأ .. عادي فيه غيره .. بس كان يوفر علي طريج مرات :)
Heba
الله يديم الفرح عليج :)
Athoob
أووف ما توصل لي هالدرجة !! إجهاض !!
الله ستر ..
صج الرسول صلى الله عليه وسلم ما قال هذا الحديث عبث
من حسن إسلام المرء تركه مالا يعنيه :)
يااااليتني ماضحكت :(
صار لي موقف حددده بايخ
توهقت من جددد :/
ان شاء الله محد شافك ولا احد سمعك
وولا احد صورك ..
<====== احلفي بس شعقبه :/
استغفر
يااشين حوبتك :/
hahahahahaha
allah eygharbil ebleesik... sij tha7aktney o aana ga3id atkhayel manthirik o e3gaalik 6aye7 min el fashla whahaahahahahaha
روح
مو قلنا لا تظهر الشماتة بأخيك فيعافيه الله و يبتليك
:P
Hitman :)
مصائب قوم عند قوم فوائد و طنازة و شماتة
:P
حياك الله :)
ترى ما قال شي غلط انا بس سمعت اولها
يقول :
عرق ما بشرب عرق
لا ويسكي و لا تكيلا
يعني شنوا تبونه يشرب ؟؟
لووووووووووول
يفترض يصكون فيرجن من زمان انا رحت كم مره شفت عناوين بلاوي
و كم فلم من الافلام المصريه مكتوب عليها ينصح لاكبر من 18 سنه
شنوا فيها ؟؟ فلم رعب ؟؟
One Engineer
السالفة مو بس سالفة كلمات .. الفشلة فشلة دنبكة و طقطقة في الدوام !!
فيرجن عليه وايد ملاحظات حاله حال أي محل من محلات الفيديو .. بس لأنه في الواجهة و في مكان عليه دوس .. كلاها أول
ههههههههههههه حده فشششله عاد انا اليوم صارلي موقف تقريبا مشابه لك وتعومست حدي وسكرت الجهاز ابكبره هههههههههه بس ما اقدر اقول اشصار فشللله هههههه
الصراحه
بوستك هذا من اجمل البوستات اللى قريتهم
والله مت ،، مت من الضحك
تخيلت الموقف
واحلى شي كلمات الاغنيه
شنو هذا ؟؟؟
عرق مابشرب
ههههههههههههههه
الله يعينك على هالموقف المحرج
بس حده يموت من الضحك
:
شكرا لك ضحكتني ،، والله ضحكت من صجي
:)))))))
LOL
تحصل في احسن العائلات
طول ما انا اقرا وقول هاا ليش ما يصك البراوسر و يخلص ! ههههه بس اعرف التيدوده هذا
لا تضحكوون عليه :/
خلال اقل من ساعه امس
صار الموقف
و الله حوبته شينه
:/
لوووووول موقف لا يحسد عليه ;p
حلاته كان في مراجعين حواليك ;p
ذكرتني بنفس موقفك بس انا مو إغنيه ..
ويهي موبس قط ألوان @@ إلا قط بلاوي لووووول للأسف كان واقف على راسي كذا شخص ;(
جد جد إنحرجت ;(
المهم عدت على خير ياخالد وغدا شرك ;")
بس جد ضحكت من موقفك وخصوصا إنك تكتب ماشاءالله كتابه تصويريه كأني أشوف شنو صار بالضبط :)
ماشاءالله عليك :)
السلام عليكم ورحمة الله وبركاته،،
^___________^
بصراحة موقف لا تحسد عليه،،اللهم لا شماتة;)
ماشاء الله عليك..أسلوبك في الكتابة يخلي الواحد يعيش الموقف معاك..
الله يبعد عنك هالمواقف المحرجة..
والعقال حله السوبر جلوو ^_*
العرق مو زين
المرق احسن
أضحك الله سنّك. أنسيتني صداعي النصفي لدقائق.
يبدو أن الأخ المغني متدين جدا ولا يشرب العرق (وهو نوع رديء من أنواع الخمور) أو أنه مرفه جدا ولا يرضى إلا بالأنواع الفاخرة. :P
على العموم أحمد الله أنها لم تكن أغنية البرتقالة وإلا لصارت الأمور عصيرا في عصير. :)
q8ya
ههههه .. وصلت الفكرة .. الله يعينج :)
7osen
الله يسلمك .. كان موقف و حبيت أشارك فيه :)
و حياك الله :)
cr8ivia
موقف يخلي الحليم حيران !!
روح
حوووبتي
:P
Dana :)
لا لا ما كو مراجعين حولي أشوة
و موقفج شكله محرج .. الله يعينج
:P
و هذي مجرد كلمات تعبر عن الموقف ..
حياج الله :)
glomhilda
الحمدلله عدت على خير .. و شكرا على الإطراء .. كتبت الموضوع فور حدوثه ..
حياج الله أختي:)
3ajel
شي أكيد .. مرق شبزي
:P
Catism
و أضحك الله سنك أيضا :)
و افتراضج معقول ..
لا لا .. هي بس مجرد أغنية عرق في عرق !!
متى بتشيل هالبوست؟
:/
روح !!؟
ليش أشيله !!؟
ههههه .. حده موقف موحلو
تعيش وتاخذ غيرها
هههههههههههههه
اخر مسخره سمعتها وما قدرت اكملها ثواني بس
اغنية يا شمه
وانا بحبك يت حمار
منو الحمار اللي قالك تغني ومعطيك ويه ودافع لك فلوس
اما عن فيرجن .. توني ادري عنه .. بس يقولولك صكوه لان ما كانوا يغطون الصور اللي مالا داعي احد يشوفهم .. صكوه يومين وفجوه .. هذا اللي سمعته
قهقهااااااااات
وعشنا وشفنا ...على حد قول أخواننا السوريين
:)
لوووووووووووول
ههههههههههههه
واى اتخيل شكلك وخبصتك ما سوت عليك
بس اشوه ان عرق ما بشرب
كلمات راقيه
هههههههههه
على الاقل ابرك من عرق بشرب
شى اهون من شى
اهى موتا موتا
ههههههههههههههه
موتنى ضحك الموقف ولا عاد لما هديت ورد اشتغل مره ثانيه
لوول شهالحااله
:))
هههههههه
موقف لا تحسد عليه
ههههه
صاج ساعات الواحد من التدوده ما يدري شيسوي
Nescafe
غابت تعليقاتج لفترة طويلة .. سعدنا بقراءة تعليقج مرة أخرى
:)
smile
لا تتشمتين ترى يمكن يصير فيج هالموقف
:P
و فيرجن افتحوه مرة ثانية .. هذي الازدواجية و عدم الجدية في تطبيق القرارات !!
واسعة الآفاق
لا تضحكين .. قولي الحمدلله لا يصير فيج اللي صار فيني
:P
charisma
الشماتة العودة
:P
ركزي بالشغل أحسن .. بلا عرق بلا بطيخ
:)
mamloo7a Q8ia
كل شي يهون إذا التدوده صار في المكتب مو في السيارة ولا في مكان خطر ..
عدت على خير
لوووووووووووووول
موقف محرج الله يعيينك عليه ...
عرق ما بشرب ..لوووول ..
أهم شي إنه البلاك يمك عشان أهو أسرع وأفضل حل وثقة ..
شكلي بستخدم نفس الطريقة اذا توهقت ..
الله يعطيك العافية يالغالي :) ..
www.bojsoom.net
حياك الله بو جسوم ..
دير بالك ترى تنحط بموقف لا تحسد عليه
LOOOL.. really funny post! 9arat feeeneee min gabil! my computer 3alag wana bil maktaba bel jam3ah.. and i think my song was slightly better than ur song! 6ab3an el kil 6a7 khaz feeny wagt'ha!!!!
LOOOOOOOOOOOOOOOOOL :D
لووووووووووووووووول
واحلى موقف XD
الحمدالله مرّ على خير يابوليد ولا جان حدّ الاحراج =|
وااااااااااااااااااااايد حبّيت
الكلمات القديمه الي مستخدمها = ")
" متعومس, البوهه .."
keep it up =D
ni3na3ah
loooooool fe elmaktaba 3aaad !!
a3aref el sh3oor fe elmaktaba ... kent 6aleb :)
mawqefech a93ab wayed :)
Cixousian Panic :)
Fatma Qatar
الحمدلله عدت على خير .. و هذي الكلمات أستخدمها بشكل يومي :)
حياج الله :)
Post a Comment