اليوم حبيت أعرض عليكم تفاصيل رحلتي مع مركز التصوير الفوتوغرافي بالنادي العلمي إلى محمية صباح الأحمد و التي كانت في يوم الخميس الموافق 8 مارس 2007، العدد فاق الثلاثين من أعضاء و عضوات المركز.
بدأت الرحلة بالتجمع في النادي العلمي الساعة 8 صباحا ، و قبل لا نحرك حطولنا ريوق الصراحة كان غدا مو ريوق ماشاء الله ..
بعد الريوق قسم رئيس المركز الأستاذ محمد العطار الشباب على السيارات و البنات في الباص .. و انطلقنا إلى الشمال صوب الصبية ..
وصلنا البوابة تقريبا على الساعة 9:30
على ما خذوا التصاريح منا و وقعنا على أوراق رسمية للتعهد بعدم المساس بالحياة الفطرية أو الإساءة لها .. الصراحة شي يسر انك تشوف اهتمام بهالطريقة .. ليت الكويت بجميع مناطقها تطبق فيها هذه التعهدات بعدم المساس بالزرع أو المرافق العامة !!
تجمعنا في الداخل بعد البوابة و انطلقنا على الجادة المخصصة .. ما يرضون أحد يشط و يطلع يدوس على العشب .. لأن الربيع هناك شي عجيب ما شاء الله .. هذا بعد احنا في شهر مارس .. لو يايين أبجر جان شفنا شي أعجب أظن !!
هذا المكان اللي في الصورة السابقة يسمى وادي الرمم .. قعدنا نصور فيه تقريبا ساعة و نص .. كل واحد يروح يمشي و معاه عدته و يصور على راحته .. الحلو في المكان ريحة الخزامى البنفسجي شي عجييب .. هذي لقطة و أنا منسدح بين الخزامى
شوي ولا أشوف أنا مع زميلي المصور يوسف الذويخ طيور ينقال لها أبو الخصيف .. كل واحد انبطح على بطنه و طلعنا العدة و ركبت عدسة الزوم
Canon 90-300mm
بس حسافة ماكانت بذيج القوة يبيلي أكبر من اللي عندي يعني
400mm and above
بس هذا اللي قدرت أصيده ..
طبعا المحمية فيها حشرات .. أنا و صاحبي اشتغلنا عليهم .. و اللقطات الصعبة اللي طلعت فيها باستخدام عدسة الماكرو
Canon 100mm macro lens
طبعا بدون تعليق يا جماعة .. لأني كنت ميت من الضحك أنا و صاحبي و احنا نصور ..
و الثانية .. الله يغربل إبليسهم .. ما كو حيا ولا مستحى !! بس هذي بروحي صدتها بعد الغدا .. بعدسة
Canon 18-55 mm
طبعا كان الكثير منهم متواجدين و عندهم موسم تزاوج .. لكن أخترت هذول الكبلز لأنهم حازوا على جائزة أفضل أداء للموسم الحالي
جني أدري الخنافس تقول .. الله ياخذهم ما خلونا نتهنى !!
لأني كل ما انسدحت و قربت الكاميرا أشوفهم يفلون .. و أنطر شوي يردون .. تالي أقرب شوي شوي .. إلين ما صدت هاللقطات
نادونا الربع لأن خلصنا من هالمكان و بنروح مكان ثاني يسمى طلحة !! ليش لحد يسألني !! ما أدري شنو علاقته بسجن طلحة ههههه
طبعا المشي يكون على الجادة فقط ..
وصلنا إلى طلحة .. و هي عبارة عن واحة صناعية .. الطيور عندها بالهبل !! بس حسافة طار عدد كبير منها لما شاف عددنا الكبير قادم
و هذي صورة المكان من مسافة بعيدة ..
و هذي هي الواحة الصناعية عن قرب ..اقعد يمها و اسمع تغريد الطيور .. يا كثرهم !!
و هذي بعض الصور اللي التقطتها باستخدام عدسة استعرتها من الزميل الأستاذ مصطفى البشير .. عدسة
Sigma 50-500
صعوة
سلاحي واقف على وحدة و نص !!
أيضا سلاحي آخر
و هني لقطات لبعض المصورين اللي تواجدوا بالقرب من الواحة الصناعية لتصوير الطيور
المصور الفذ الأستاذ فيصل البشر ..
و أخوي المصور المحترف الأستاذ مصطفى البشير
و زملائي من اليمين م.ضاري العبيد و جراح البلوشي
و المصور المجهول عبدالوهاب الأصبحي .. متغطي علشان الطيور ما تخاف منه و مطلع البازوكا بانتظار اللحظة المناسبة
و يوم حان وقت الغداء .. ما تلاقي أحد حول الواحة الصناعية .. طقنا اليوووع
و هذي بعض اللقطات اللي خذيتها قبل الغداء بفترة بسيطة باستخدام عدسة الماكرو
Canon 100mm Macro lens
هذي أم علي بس ممغوطة !!
هذي الوردة مسكرة و شكلها مثل القبضة !! سبحان الله
A New Life - Canon 18-55 lens used here
في النهاية أقدم خالص شكري لمركز التصوير الفوتوغرافي بالنادي العلمي و القائمين على هذه الرحلة .. لإتاحة الفرصة لي و لزملائي لزيارة محمية صباح الأحمد و التمتع بالتصوير في ربوعها ..
كانت تجربة جديدة بالنسبة لي و خصوصا التصوير الدقيق و تصوير الطيور ..
شكرا لكل من ساهم في إنجاح هذه الرحلة
38 comments:
خل الصور الحين..
الطلعه نفسها شكلها قمة بالوناسه و راحة البال..
يعني أنا قاعد أشوف الصور و أقرا هالشرح الوافي و استانست.. شلون اللي راحو؟
:D
قواك الله أخوي خالد و الله يهنيكم و يونسكم بالعفو و العافية
:)
Wow mashallah very beautiful
it must have been mateing season when u guys went lol
and about the ta3ahod, that should be common sense, why ppl just go around abusing plants trees, and anything else is beyond me!
Thanks for shareing
wnaaasaaa .. enzen etha nbe nro7 shlon ?? y9er nro7 ay w8t ??
9g 9g woooow elmkan yshaw8 ..
thnx for sharing ;)
لقطاتك روعة مشالله
خصوصاً العدسات شلون لاعبه بالصور
---
خوش طلعه والله آنا اللي قاعده أطالع الصور أحس جني رايحة هناك من جمال الصور والمناظر,
وعليكم بالعافية
راااااااااااااااااااااااااااااااااائعه =D
خاطري في روحه لجذي لمحميه = '(
ماعندنا بقطر !
كل لقطه اروع من الثانيه يا خالد شي مو طبيعي XD
امنيتي بلقطه للخزاما XP
ان شاء الله اصادف اللحظه الي
توفر لي التواجد مع هالزهر الي ريحته وشكله رائع
تسلم لنا وتسلم كامرتك ^_^
تفاصيل رائعة ..
و صور كالعادة ابداع ما شاء الله ..
الله يعطيك العافية =)
Moyad
إي والله وناسة و حدها راحة بال .. ما حواليك إلا الخضرة ..
الله يقويك أخوي مؤيد .. أسعدني تواصلك
eshda3wa
yes it is mating season I think .. you can see alot of couples there !!
welcome :)
Red Lady
register in Kuwait Science Club - Photography center .. and inshalla if they have a trip to the natural reserve , you can take a part :)
welcome :)
جنون إحساس
العدسات فعلا تساعد المصور .. الله يعافيج أختي و حياج الله
FatmaQatar
إن شاءالله تحصلج طلعة لمحمية .. و أسعدني تعليقج و إعجابج بالصور ..
والله يسلمج مشكورة أختي
مشالله ياخالد توثيق روعه
والصور اروع واروع
والله استمتعت بكل صوره مصورها
مشالله عليك ... ابداع
موفق دوم يارب وانشالله دايما تكون تبهرنا بأعمالك الطيبه
عسى الله يوفقك ويسر امورك :)
صباحك ورد
:)
عن جد يا خالد صور حلوة خيل و مجهود تشكرون
رائع و تشكرون عليه .. برافو
كمل و استثمر طاقاتك و مواهبك
فنان يا خالد
ما شاء الله الصور واااايد حلوه
الله يخليلك كامرتك ويخلي كامرتك لك .. ويكثر من امثال صورك
والله حلوه المحميه اول مره ادري عنها
GOOD JOB
Heba
الله يسلمج هبة وما قصرتي كلامج طيب و أسعدني
و عن نفسي .. دائما في ترقب لعمل جديد منج ..
ناطرين أحدث عمل يا فنانة
طائر بلا وطن
صباحك عسل يا طائر الأشواق
أمتعني تعليقك يا خوي .. شكرا جزيلا
smile
أبتسم من أشوف بو ضرس اللي طالع يم النك نيم ههههه
الله يحفظه لج ..
و دمت مبتسمة
ما شا الله الصور حلوه بس احس السما مو طبيعيه ؟؟؟ عسى مو ترجيييب وفوتو شوووب ؟؟؟؟
وفي ويوه ماره علي من قبل
وماشا الله عندكم مصورين جيدين .. لكن بيني وبينك تصوير الديجيتال احس كأنه لعبه من جذي تشوف زيادة عدد المصورين
اللي لو تهدهم يصورون فيلم ما تلاقي صوره سنعه
واذا تبي تيرب احترافياتك بس بدون ما تقول لحد اخذ كاميرا فيلم بست وثلاثين صوره والفلم كونيكا او فوجي بس خا تكون ماركة الكاميرا نفس ماركة كامرتك اللي الحين علشان العدسات وروح لمكان ما قط صورت فيه وصور وارجع حمظ الصور وشوف امكانياتك...وعطني خبر وبظبطك افا عليك
حلاته قبل الواحد ياكل تبن اذا ماعنده الا فيلم واحد
في احد معاكم يصور بفيلم؟؟
او سلايد؟؟؟
اذا في عطني البومه ودي اشوفه سواء على اديجي كام ولا فليكر :)
تسلم يور هاااند
تسلم ايدك باش مهندس
صور رائعة
قلتلك انت فنان
بس لو الله يهديك و يفكك من هل اخونجية
:P
رائع بوستك و صورك اروع يا صاحب
:)
woow طبيعة رائعة وجسدتها بشكل اروع في تصويرك ماشالله عليك
مشاءالله
امس مريت على السريع على بلوقك بس قلت خل اشوف
اليوم لمن رجعت قلت خل اتمقل عدل بصور
مشاءالله عليك والله جد مشاءالله عليك
اشوف موهبك واضحك على عمري
لمن خذيت ماده التصوير الفوتغرافي في الجامعه
لوووول كانت جد خيال
لوول انا اقول صج الله ياخذ شى وخاليك تبدع في شى ثانى
طور موهبتك
واستغلها عدل
ماكو اروع من انسان موهوب ومتمز في شى
abi aroo7 :(
I didnt know Kuwait has natural beauty like that...thanks for sharing :)
bas ham abi aroo7 :P
ماشالله الصور حدها شيييييي
يعطيك العافيه جد الصور حلوه
:)
يبا خلونا نروح هالمحمية اللي بس الشيوخ قاعدين يروحونها
بكل بساطه حطو رسم دخول متوسط مو رمزي علشان مو كل من هب ودب يدش
وخل يوقعونا على اي ارواق يبونها وفوق هذا خل يفتشون السيارة اذا فيها شوازن ولا فخوخ وفوق هذا خل يسيرون دوريات خاصه بالمحمية تدور على الزوار تشوفهم اوادم وسنعين ويلتزمون بالقانون ولا لا
وفوق هذا هم كل عايلة تدش يعططونها جيس زبالة تحط فيه وصخها عقب ماتطلع ويشرطون عليها انه تنظف مكانها ولا تدفع غرامه قوية
وخلو الناس تروح
تستانس
شهالمصاخه
عتيجة !!
صوري ما أركب فيها شي .. أعدل ألوانها بس و الكونراست و أزيد الحدة شوية لكن مو تركيب !!
ثاني شي .. شنو هالمعلومات ماشاء الله عليج .. شكلج لج بالتصوير !!
و تصوير الديجيتال ممتع و غير مكلف مثل التصوير باستخدام الأفلام !! ليش ما نستغل التكنولوجيا دام احنا مرتاحين من استخدامها !؟
ليش نرد لعالم الأفلام و التحميض و لوعة الجبد !؟
أنا واحد ما عمري صورت شي احترافي بالأفلام .. كانت عندي كاميرا صغيرونه طوالية .. خبرج اللي تكوكينها بعدين تصورين .. أذكر مرة ربحتها من كنتاكي طوالية هههه ..
بعدين تطورت و شريت كاميرا باناسونيك حق اللقطات العائلية و شغلات جذي ..
هذا خبري بالتصوير الفلمي !!
و ماراح أصور باستخدام الأفلام .. أنا مرتاح جذي .. عفوا الطلب تم رفضه بشكل قاطع
:P
و الله يسلم يووورز توو
Neo
الله يسلمك نزيه
:P
و ماعليك زود يا خوي انت هم فنان بالتأليف و نشر الإشاعات .. و عسى الله يهديك
:P
و سررت جدا لمرورك و تعليقك و حياك الله
تكانة .. مشكورة اختي و حياج الله
سنعة و لكن ..
أسعدني رأيج بالصور .. الموهبة من الله لكن يبيلها صقل و ممارسة وتدريب .. و مشكورة على الكلام اللطيف :)
انا ياخالد شهادتي بصورك مجروحة
ما شاء الله ماشاء الله ماشاءالله
جد جد جد رائعة
جني بعالم اخر
وفي صورتين بأه نتفاهم عليها بعدين
واللله وطلعت صايع ياخالد
اول شى بتكلم عن تصويرك قبل المكان
ماشاءالله عجييب
انا غرامى اللوحات التصويريه
وجد اذا فيه معرض قولى بليز
احب اتأمل هالنوعيات من الصور وخصوصا الطبيعيه
اما المكان فروعه
بس والله قمت احاتيهم اذا يا الصيف
:(
عسى ما ينصهروون فقاره
:(
لمكان جدا جميل
والصور زادت في جماله
الله يهنيك بهالموهبه
بصراحه انا حاولت ادش بالتصوير بس لقيت ان هالهوايه تبي وقت و صفاء ذهن و مصرف :)
بعد التحية
صراحه خوووووش صور .. انا شخصيا احب التصوير .. و كانت صورك فوق الرائعه ...
صور الخنافس خلتي اضحك بصوت عالي .. و قليل ما يحدث ذلك .. مشكور انك ضحكتني .. هذي صور R-Rated
سعدت بزيارة مدونتك
بركـــان طخ شويه
Ghasheema
اشتركي بعضوية النادي العلمي و انضمي لمركز التصوير الفوتوغرافي
وان شاء الله راح تروحين :)
My sold
الله يعافيج :)
Krakatoa
والله اني فاهمك يا بو الشباب بس ما بيدي شي .. أنا مجرد عضو في مركز التصوير الفوتوغرافي ما بيدي شي ..
الشباب الله يعطيهم العافية طلعولنا تصريح باسم النادي العلمي ولزيارة واحدة فقط !!
اللي لاعبينها صح أعضاء فريق العمل التطوعي .. ما شاء الله عليهم .. الأعضاء لهم تصاريح دخول للمحميات !!
يبا أنا فقير حالي حالك .. لو مو النادي جان ما دشيت .. خلها على الله
albandry
شكرا أختي من ذوقج الله يسلمج ..
و عفوا الصورتين مروا على مراقبة المصنفات الفنية .. و أجازوهم .. محد له الحق يتكلم عليهم
:P
Charisma
حضورج و متابعتج تسرني أختي الكريمة ..
و مشكورة من ذوقج ..
و أقرب معرض لنا كأعضاء مركز التصوير في النادي العلمي راح يكون في المارينا مول بتاريخ 4 إبريل إن شاء الله
و حضوركم يشرفنا
و في الصيف شي طبيعي يصيرون أهم و التراب واحد !!
الطارق
مرحبا بك في مدونتي البسيطة .. نورت المكان يا أخوي ..
لو علمت الدار بمن قد زارها فرحت
واستبشرت ثم باست موضع القدم
وأنشدت بلسان الحال قائلة
أهلاً وسهلاً بأهل الجود والكرم
و عيونك الحلوة ..ما قصرت
حياك الله أخي الفاضل ..
flirty
مشكور يا خوي أسعدني كلامك ..
و فعلا التصوير يبيله مقاقة و صفاء ذهن و مجابل وفوق هذا الهواية مكلفة جدا !!
حياك الله
بركان ..
هلا ومرحبا .. شرفت المدونة أخي الكريم .. و شكرا شكرا على الكلام الحلو و حاضرين للطيبين
صور اكثر من رائعه
يعطيك العافيه
فعلا روعه
جهد بارز ورائع ..!! صور جميله وخياليه ..!! الله يوفقك ويزيدك موهبه ..!! بس لو تدز لنا بعض الصور على "أي/ميل"أكون شاكر لك ..!؟
Wooooow Nice trip :)
But I couldn't see half of the pictures .. cauz they're uploaded on Flickr ..
And it's Blocked in the UAE :|
Keep up the Good Work BRO :)
ماشالله تبارك الرحمن
لقطات متميزة
والحمدلله منها وناسه ومنها افاده :)
انزين لو سمحت فيه صوره اللي طريج وسما .. إذا ممكن استخدمها بتصميم وحقوقكم بتظل محفوظه
7osen
الله يعافيك أخوي مشكور
2 u all
مشكور أخوي و ما قصرت ..
و أعتذر أخوي .. الصور موجودة على
www.flickr.com/photos/kuw_son
و شاكر لك يا أخوي
tnateef.net
Thanks alot .. 7asafa ma teqdreen tshoofenhom !! yalla inshalla yfekoon el 7e9ar 3nkom :P
Relaaax
مسموحة أختي .. بس ياريت تحطين الإسم و أكون شاكرلج
شكل
الطلعة حلوة
والصور أحلى
من جد مبدع كعادتك
حتى المكان روعة
ما توقعت يكون فيه مكان بهالخضرة
* * *
إستفسار :
الليّ معاهم هذي كاميرا ولا بازوكا؟
miami
شكرا أختي الكريمة على الكلمات الجميلة
و الإجابة عن سؤالج :)
أكيد كاميرا
تسلم إيدك اللي صورت
هاللقطات الجميلة
ما شاء الله لقطات جميلة
تستاهل عليها جائزة أفضل مصور
في أكبر مسابقات العالم
تصوير الطبيعة شيء جميل جدا
وما شاء الله
عيني عليك باردة
عندك نظرة في اصطياد اللقطات الجميلة منها
والحساسة في بعضها
:))
الله يوفقك ويطول عمرك
ودمت بحب وأنفة
sologa bologa
الله يسلمك يا أخوي .. كلمات ترفع من المعنويات ..
الله يعطيك العافية .. متابعتك أسعدتني ..
و شاكر لك اهتمامك :)
عافانا الله ..
ما قالوا فالج طيب بنغير لنكات الصور
:P
شكراً على الدعوة الطيبة يالطيب
chaaaawz :P
المفروض مو انت تستعير منهم عدسات وإتصوّر المفروض اهم اللي يستعيرون منك هالذوق في اصطياد اللقطه
من زمان قايلك انك فنان
قعدت متسمر جدام الصور فرحت احنا بالكويت عندنا جذيه ماشاء الله
شي نفتخر فيه والله
مثل ماافتخر بابداعاتك
انت بيدك ريشه وترسم مو كاميرا
ماشاء الله تبارك الرحمن
tnateef.net
والله ودي بس مالي خلق
:P
chaaawz :P
Barrak ..
عيونك الحلوة يا أخوي .. الله يعطيك العافية .. كلماتك ترفع من همتي و معنوياتي ..
الله يعطيك العافية
Post a Comment