كتبت في موضوع سابق عن مسج غريب جدا لم أكن أتوقعه من ولد عمتي .. خبص علي اليوم كله.
قبل جم يوم وصلني مسج من المصدر نفسه .. بس هالمرة عرفت ان الرسالة مغزاها عميق جدا و يقصد من ورائها أن أتمعن في معاني هذي الأبيات الجميلة .. فبعد هذا المسج صارعقد بيني و بينه .. من يوصله أبيات لها معاني عميقة راح يدزها لي و على طول بشارككم فيها :)
الأبيات تقول :
ما للرفيق إلا رفيقه ليا اعتاز
إما نفع ولا بلاش الرفاقة
أحدن لنا في مكسر الساق معكاز
و احنا له المعكاز في كسر ساقه
بعض العرب اسكب على صحبته قاز
احرق غلاه و لا يهمك فراقه
والله صح لسان من قال هذي الأبيات .. إحرق غلاه ولا يهمك فراقه !!
أفضل الخلان و الأصدقاء
من إذا استنصحته نصحك
و إذا غبت عنه حفظ ودك
و إن سمع عنك سوءا ذب عن عرضك
و إن احتجت له وقف بجانبك
و إن ضاقت عليك الدنيا وجدته حولك
------------------------
فمن لي بذاك ليت أني وجدته
لقاسمته ما لي من الحسنات !!
الشافعي
و أقول في هذا المقام:
اشخانة الدنيا
إذا مافيها رفيج ..
أشيله و يشيلني !؟
اشخانة الدنيا
لو صاحبي شافني أطيح ..
ما ألقاه يسندني !؟
اشخانة الدنيا
إذا مافيها صديق ..
إذا زليت يقومني !؟
اشخانة الدنيا
لو اني اعتزت ..
أدور يمين و شمال ..
أقول: وين ربعي !؟
اشخانة الدنيا
لو اني مت ..
محتاج دعاء ..
صديقي حتى المقبرة ..
ما مرني !؟
و أستشهد بقول الشاعر ..
ما أكثر الإخوان حين تعدهم
لكنهم في النائبات قليل !!
و في المقابل ..
أبي دنيا ..
فيها حب
فيها ود
فيها معزة
حب لله
بدون شروط
أبي دنيا ..
فيها الوفا
فيها الغلا
بين القلوب
ماهو عالورق
و بحبر مخطوط
أبي دنيا ..
أشوف الإخوان
أشوف الربع
أشوف الحبايب
مرتاحييييين
و الكل مبسوط
أشوف الإخوان
أشوف الربع
أشوف الحبايب
مرتاحييييين
و الكل مبسوط
35 comments:
احرق غلاه
!
الحرق مو للغالين .. اشباههم و الا ما يطاوعك قلبك
;)
الاصدقاء انواع .. ربع سوالف .. ضحك .. شغل .. هوووموركااات
و صديق .. بس يسمع صوتك
يحس فيك .. و تلاقيه يمك
قلبه على قلبك .. لو ما تكلمت
:")
الله يخلي اختيني بطرش لهم المسج
;D
الله يونسك دنيا و آخره
و يعطيك على قد نيتك يا صاحب
a7la eng
طبعا حرق الغلا مو للغالين .. الغالين في القلب و إن احترق غلاهم يعني إحتراق القلب و موته
ناطر منج ردة فعل الضحايا :)
الطارق
صح بدنك :)
neo
آمين .. حياك الله أخوي :)
خووووش ابيات
وقفت عندها مددددددة و حفظتها
السلام عليكم اخوي خالد
ياخوي كلامك يبرد القلب و لكن شتسوي في اشخاص للاسف الشديد
مايخلونك تفارقهم و يتسببون لك بازمات نفسية
توخر عنهم مرات و يلاحقونك بكل مكان و يحولون حياتك الى جحيم
====================
أفضل الخلان و الأصدقاء
من إذا استنصحته نصحك
و إذا غبت عنه حفظ ودك
و إن سمع عنك سوءا ذب عن عرضك
و إن احتجت له وقف بجانبك
و إن ضاقت عليك الدنيا وجدته حولك
هالكلام اهديه حق قيادية الغالية
واقولها حبي لج .. اثمن من اغامر فيه ببورصة الأسهم
اشسالفة الاسهم عاد اهي تدري :p
صح لسانك ..
و احلى شي بالدنيا الصحبة الصالحة الي اتعينك على الطاعة ..
و يكونون معاك بالشدة و الفرح ..
من غير مصالح ..
و من سماحة الدين ..
انه هذي العلاقة لها فضل عظيم ..
المتحابون في الله لهم منابر من نور يوم القيامة ..
و يظلهم الله في ظله يوم لا ظل الا ظله ..
و حث الاسلام ايضا على مساعدة الصديق
وكما قال الرسول صلى الله عليه وسلم :
احب الناس الي الله انفعهم ,واحب الاعمال الي الله عز وجل سرور تدخله على مسلم او تكشف عنه كربة ,او تقضي عنه دينا ,او تطرد عنه جوعا ,ولأن امشي مع اخي المسلم في حاجه احب اليّ من ان اعتكف في المسجد شهرا ومن كف غضبه ستر الله عورته ,ومن كظم غيظا ولو شاء ان يمضيه امضاه ,ملأ الله قلبه رضى يوم القيامة,ومن مشى مع اخيه المسلم في حاجته حتى يثبتها له اثبت الله تعالى قدمه يوم تزل الاقدام ,وان سوء الخلق ليفسد العمل كما يفسد الخل العسل
و طبعا هذا غير الامثلة الي تدل على اهمية الصداقة و الاخوة بالنسبة للانسان ..
و مافي انسان طبيعي يقول انا ما احتاج احد !
اثرت فيني جملتك بردك على احلى انجنير :
الغالين في القلب و إن احترق غلاهم يعني إحتراق القلب و موته
عذرا على الاطالة ..
يعطيك العافية =)
عقب ما رديت شفت رد عذوب ..
ردينا مع بعض ;p
عذوب سلامتج من الازمات النفسية و الجحيم ..
و هذول الناس ينفعلهم هالبيت :
إحرق غلاه ولا يهمك فراقه
;p
عذرا اخوي خالد
طلعنا بره الموضوع انا و عذوب ;p
أحدن لنا في مكسر الساق معكاز
و احنا له المعكاز في كسر ساقه
هذا البيت اكثر من رائع
والدنيا ماتسوى بدون صديق صدوق
تلقاه متى ما احتجته
ويلقاك متى ما احتاجك
الدنيا واايد احلى بالاصحاب والحبايب 0
كلمات جميله جدا
والله يوفقك بالصاحب الطيب
الله يكثر الأصدقاء الأوفياء المضادين للحريق :p
صح لسانك
اهلااا هلااا يا بو وليد
يعطيك العافيه على هالكلمات الطيبه
شدعوة يا الاخو شهالتشاؤم خلك متفائل
وانا اخوك
بس ما عليه بو وليد عندي شغله بدش فيها عرض
حياكم يا جماعة بلووقي شدعوة ما عندي احد ترى :)
www.q8stock.blogspot.com
دمتم بود
اخوك
ستوك
المشكلة كل ما تكبر الدائرة تضيق
انا ربعى وايد والحمدالله وين ما اروح مكان اعرفلى احد
بس صديق
دائرة محدودة محصورة على 4 او بالكثير 5 تم تجربتهم وفحصهم فى مواقف عديدة وناس اثق فيهم لانهم رجال فى زمان قلة فيه الرجولة
وان كان تبى تحرق احرق كلمن يخون ويلعب بذيله
صح لسانك واختيارات شعرية جميلة
صح لسانكم
والله يحبب فيك خلقه
أبيات حلوة وقوية
بس عندي رايي
أتوقع انا لو احنا اتصفنا بهالصفات مع أصدقاءنا .. شي أكيد راح يبادلونا نفس الصفات
لو ساعدتها بتساعدني
ولو وقفت معاها بتوقف معاي
ولو حفظت ودها وسرها في غيبتها بتحفظني في غيبتي
فليش ما احنا نبادر ونعامل الناس مثل ماودنا انهم يعاملونا؟ وننطر منهم الاحسان
:)
و أستشهد بقول الشاعر ..
ما أكثر الإخوان حين تعدهم
لكنهم في النائبات قليل !!
وقفت عندا وايد
لان لو اعدلك الى حوالى من ربع وصداقات اسطر لك صفحات من اسمائهم
بس وقت الشده
ووقت الصجيه
فهم ما يتعدون اصابعك الخمس
2 او 3 بس
وهم بالحقيقه مو متواصله معاهم كثر الشلل واللويه الى اعرفهم
بس بالشده والازمات تلقاهم اول الناس
بوست عجيب
cr8ivia
أبيات تستحق الوقوف عندها أكثر من مرة
athoob
و عليكم السلام أختي عذوب ..
والله هالأوادم ما يفيد معاهم شي !! الله يعينا عليهم ..
و تستاهل قيادية
Qiyadiya
الله يعطيج العافية أثريتي النقاش .. ضربتي أمثلة رائعة بارك الله فيج
و نقاشكم انتي و عذوب يبيله بلوق خاص فيكم .. راح أدرس فكرة إنشاء بلوق خاص في اللي يشطون عن الموضوع علشان ما يحوشنا طشار
:P
أخذوا راحتكم و المكان مكانكم
7osen
آمين و عسى الله يحفظ لك أعز الناس .. حياك الله أخوي :)
moayad
الظاهر بعد قراءة هذي الأبيات الداخلية بتطبق قانون يديد مفاده أن حتى المشاة لازم يكون بمخابيهم طفايات حريق ههه
:P
Parallax
صح بدنك
stock
أثاري هالترحيب و التهلي مو لله
:P
إي إي .. كله على أفاي ..
تمون تمون يا الحبيب :)
Mishari
الله يكثر ربعك الطيبين و اللي ينشد الظهر فيهم ..
و صح بدنك و حياك الله :)
Barrak
صح بدنك يا أخوي .. و حياك ربي
b9mah
طبعا على اعتبار إن الإحسان المفترض يقابل بالإحسان ..
و شي أكيد لا نتوقع الإحسان من الغير و الإهتمام منهم ما دمت لا تهتم أو تحسن إلى الناس
ففاقد الشيء لا يعطيه !!
دمت و سلمت
charisma
هذا البيت بالذات أحبه وايد .. حافظه من زمان و دائما أحرص على أني أحط الأسباب اللي تخلي هذا البيت يطلع غلط ..
الحمدلله علاقتي طيبة مع الجميع .. و في ناس مخصوصين لازم أشحن علاقتي معاهم عدل لحبي لهم و لحرصي عليهم .. فهم زينة في الرخاء و عدة في البلاء بإذن الله
و أبي يطلع البيت غلط .. علشان لما أعدهم في النائبات ودي ألقاهم وايد
:))
وكل ما دزلك ولد عمتك مسجات من هالنوعية لا تبخل علينا في نقلها لأني جد أستمتع بهالأبيات !! أصلاً المسج اللي على قولتج إخبصك فيه .. حفظته بموبايلي و حفظته عن ظهر قلب و قمت أقوله حق الكل لووول .. يعني حكيمة و كلامي له معنى :))
صااج والله و قواك الله على هالموضوع .. صج الصديق وقت الضيق ..
و بالأوقات الصعبة يبين الرفيج السنع !!
موضوعك ذكرني بنشيدة يا رفيق الدرب (محمد الحسيان)
أحبــــــهــــــاّ
!!!
:))
لفت نظري الكلام اللي بالصورة
واكتمل عندي الجمال لما قريت البقية ..
احس للابيات بقية ولكن ..
صح لسانك
وصح لسان صاحبك
breeze
إن شاء الله .. على طول راح أحط أبيات إذا وصلتني منه ..
و تهقين ليش حاط في خانة الموسيقى المفضلة الوحيد محمد الحسيان
;)
أناشيده مو طبيعية
alather
صح بدنج أختي الكريمة و حياج الله شرفتي المدونة :)
ee wallah abi denia ma fiha nefaq...momken...wala these days thats too much to ask for!!
hathie almasejat eli etheek wayed 7elwa...I suggest you write them all in a post :) plzzzzzzzzzz
ghasheema
it is hard now adays to ask about loyality and frankness !!
Allah y3een ..
w it is difficult to post them in one post coz they hold different meanings .. each one has its own flavour :)
الصديق الحقيقي : هو الصديق الذي تكون معه, كما تكون وحدك
اي هو الانسان الذي تعتبره بمثابة النفس
الصديق الحقيقي : هو الذي يقبل عذرك و يسامحك أذا أخطأت
و يسد مسدك في غيابك
الصديق الحقيقي : هو الذي يدعي لك بظهر الغيب دون ان تطلب منه ذلك
الصديق الحقيقي : هو الذي يحبك بالله و في الله دون مصلحة مادية او معنوية
الكنز ليس دائما صديقا و لكن الصديق دائما كنز
منقول
بوست مؤثر وابيات معبره
سالفة قلب ..
دائما إضافاتج تثري الموضوع .. بارك الله فيج ..
يقول
أنا ما انسى رفيقي لو نساني و اخلف المشوار
أرحب به اليا شفته بصدق احساس و الساني
واليا منه جفاني كل(ن) بالعرب مختار
يبى يلقى و بلقالي بداله صاحب(ن) ثاني
رفيقي من وقف جنبي اليا خان الزمان و جار
و اليا من خان به وقته يدورني و يلقاني
لي خاب ظنك بالرفيج الموالي
مالك مشاريه على باجي الناس
طائر بلا وطن
ارحمني .. ضعت بين الأبيات .. والله من قوتها تنحت ..
أثريت الموضوع الله يعطيك العافية .. مشاركة ممتازة
Flirty
عدل .. صح لسانك
اللي تركني وأنا في عز غربالي
بعد الشدايد وش اللي ذكره فيني؟
يبغى زمانه يعود ويرجع الغالي
وشلون يرجع بعدما طاح من عيني
لا الوقت وقته ولاله شي في بالي
أنا نسيته مثل ماكان ناسيني
كلمات بودي أن أقولها لكل من لم
تقدر معنى الصداقه الحقيقية
أو تتعمق في معنى الأخوة في الله..
يردني عن ذلك خوف من جرح الخواطر..
..بصراحه..نادر تلقى الصديق الصدوق
الصادق بهالوقت..صديقاتي أعرف بعضهم من
أكثر من 8 سنين..و اثنتثان من 12 سنه!
لكن..أشهد الله في عرشه..إني ماقصرت
فيهم وبولا مناسبه ومن غير مناسبة..
ونعذر..ونلتمس 70 عذر
وبعد الـ70 نلتمس ألف !..
لكن بإعتقادي..كل انسان يتصرف حسب بيئته
التي اتى منها..في كثير من البيئات عايشين بجفا
ويظنون هذا هو الصح..ربي يرحم قلوبهم
ذابت بعز الشباب!
وشي احب اقوله..لمن خالط حبها شغاف
القلب..وإن كانت بعيدة عن عيني وسمعي..
يوزن المرء بمن صاحب وأختار وليا
وأنا اخترتك فأزددت رقــيــا ورقــيــا
عذرا عالاطاله..لكن موضوعك ذو شجون :)
*للأمانه:الأبيات للشاعر فهد المساعد وليست لي..
روح
عسى الله يخليلج صديقاتج المخلصات و يكثرهم ..
إضافة رائعة .. شكرا أختي الكريمة
كلمات روعة
فغلا الصديق هو من صدقك
ومن يحس بحاجتك من غير لا تطلبها
والحرق لاصدقاء المصلحة
الله يعطيك العافية على هالبوست
أحرق غلاه
:)
لالا والله صعبه إذا كان الحب من قلب
ميخالف أتحمل بس ما أنسى الغلا اللي
بينّا
وبيعذبني الفراق
يمكن التعبير كنوع من التحدي
"من باعنا برخيص بتراب ينباع"
---
أجمل مافي الحياة
أخ يخفف عنك آلامك
.. تترك الدنيا وهمومها
تدور مكان تمشي بطريجك وحيد
..يقابلك أخوك بابتسامه
مانبي أكثر من جذيه
الله يرزقنا ويرزقكم
الصحبة الصالحة
:)
mamloo7a Q8ia
الله يعافيج أختي ..
جنون إحساس
و الله مو صعبة .. إذا ماكو فايده من صديق مصلحة .. الترك أفضل و أريح .. حتى لو عشرة !!
ثاني شي إذا انتي تدرين ان هذا الصديقة صديقة مصلحة .. فالعتب عليج إنج بنيتي عشرة و رفجة معاها !!
من الأول المفروض نكون حذرين من أصحاب المصالح
و عسى الله يرزقج الصحبة الصالحة :)
حياج الله أختي الكريمة
صح لسانك
على الكلام كله ياخالد
كل كلمه قلتها اثرت فيني شخصيا
الله لايحطكم بتجربه جذي
لانها فعلا تأثر
وبالاخر
إحرق غلاه ولا يهمك فراقه
الصوره روائعه ياخالد ومعبره جدا
مميز اخوي الكريم :)
السلام عليكم ورحمة الله وبركاته،،
كثرت صداقات المصالح،، وصداقات المجاملات
كثير إنطعنت من أناس حسبتهم أخوة لي..سامحهم الله
أنا بالنسبالي الصداقة شي مقدس لا يجب تدنيسه بأي شكل من الأشكال ومن رأى نفسه غير كفؤ للصداقات فليعش لوحده
الصداقة الحقيقية هي التي تكون خالصة لوجه الله
قال تعالى: "الأخلاء يومئذ بعضهم لبعض عدو إلا المتقين"
الحب في الله قصة جميلة
تبدأ بالتناصح والتواصي عند اللقاء ..
وتستمر بالدعاء في ظهر الغيب ..
وتنتهي باللقاء على منابر من نور يوم القيامة ..
وسلامتكم
مشكور أخوي على نقل الأبيات وإتاحة الفرصة لي لفضفضة مابداخلي
حفظك الرحمن
Post a Comment